Bidlisiw sa Kabuntagon - Gula 4

Kay nakabantay man si Tessie nga grabe kamanggiuwawon sa iyang kapartner, siya na mismo ang mihimo’g paagi nga manginit ang kalawasan ni Magno. Si Tessie na ang miipis sa beer ngadto sa baso ni Magno.

Dayon giparaygan ni Tessie ang manggiuwawon niya nga customer. “Abi nimo Magno, tungod sa imong kinaiya mora’g na-interes hinoon ko nimo kay mora ka g’yud og tinuod nga walay kasinatian sa babaye,” matud ni Tessie.

“Wala ka gayud masayup sa imong pagtan-aw kanako Tess, wala pa g’yud ko’y kasinatian kabahin sa babaye. Kanunay lang gani ko nga bugal-bugalan anang amigo nako nga si Ely,” gihunghongan ni Magno si Tessie.

Dayon miabut ang panahon nga mosayaw na usab si Tessie. Nananghid si Tessie kang Magno nga mobiya usa’g kadiyot, apan sa wala pa hingpit nga mibiya gipatikan niya’g hawok ang iyang kapartner.

“Fight bai! Ayaw’g luya-luya,” giingnan ni Ely ang iyang higala. Gitudloan ni Ely ang iyang higala kun unsay maayong buhaton ngadto sa iyang kapartner. Mingisi lang si Magno nga giubanan sa lingo-lingo.

Human makasayaw sa stage, mibalik si Tessie sa nahimutangan ni Magno nga wala na mag-ilis sa iyang gisul-ob. Nakatupis gihapon si Tessie apan igo lang nga nakapangutkot sa iyang ulo si Magno.

Sa atbang nasigpatan ni Magno ang iyang amigo nga si Ely nga pwerteng nakatutok ni Tessie nga nag-amag ang kalawasan sa kaputi nga ang labing pribadong parte sa lawas ra ang adunay tabon.

Nakabantay si Magno nga si Ely nagsige og kihat-kihat kaniya nga nagpasabot nga himoon na ang iyang gitudlo. Tuod, giagbayan ni Magno si Tessie. Dayon anam-anam nga nanaug ang iyang tuo nga kamot ngadto sa hawak sa babaye.

“Nanginit na ba ang imong kalawasan? Dugaya nimo painiton uy kun tinuod nga wala ka pa makasuway og babaye,” matud ni Tessie nga nagngisi. Gibawsan ni Tessie paggakus si Magno ug gihapuhap ang iyang buko-buko.

Nakabantay si Tessie nga mora’g wala na mahimutang si Magno. Mora kini’g nag-alindasay na. “Duna ba kamo’y private room dinhi?” gipangutana ni Magno si Tessie nga dali kaayo nga nakapanglingo-lingo.

May gihunghong si Magno kang Ely. Nagngisi si Ely nga mihunghong pagbawos kang Magno. “Lakaw na mo,” matud ni Ely. (Sumpayan)