Tsikboy nga Enforcer Gula 7

“Kalooy gud diay ninyo nga mga CITOM enforcer. Dugay diay mo nasweldohan?,”  nakapangutana si Janice kang Bert dihang ang ulitawo nga traffic enforcer mitug-an nga apiki siya’g kwarta kay wala pa sila makadawat sa ilang sweldo adtong Enero 15.

Nakapangutkot sa buhok si Bert nga daw gibati’g kauwaw. Mipara siya’g taksi nga ilang kasakyan paingon sa iyang giabtan nga kwarto sa barangay Pahina-Central. Samtang nagdagan ang taksi, gikuot ni Bert ang iyang pitaka ug mipasalipod samtang giihap niya kun may ikabayad pa ba siya sa ilang pletehan.

Dihang gilili ni Bert ang metrohan sa taksi, nakapahiyom si Janice ug mitunol sa tibuok P500 ngadto sa ulitawo. “Kana na lay kuhai sa atong plete Bert,” matud ni Janice. Mora’g mahilis sa kauwaw si Bert nga ang iya na hinoon nga girlfriend ang miplete sa gisakyan nila nga taksi.

“Pasensya na Jan ha, unsaon apiki g’yud karong panahona. Sagdi lang kay kun masweldohan na ‘sab ko, mobawos ra ko nimo,” matud ni Bert dihang nakakanaug na sila sa taksi ug nagsugod na’g lakaw paingon sa gipuy-an niya’ng kwarto nga nahimutang daplin ra sa karsada.

“Ingon sila nga kwartahan kuno ang mga traffic enforcers kay daghang drayber nga madakpan ninyo nga manghatag ra’g kwarta,” matud ni Janice. “Dili tanang enforcers nga modawat og suborno sa ilang madakpang drayber, usa ko kanila,” dali nga tubag ni Bert kang Janice.

Gikuot ni Bert ang yawe sa iyang bulsa ug giyawehan ang siradora sa pultahan sa kwarto nga anaa ra sa silong mahimutang. Gipasiga niya ang suga sa sulod ug nanulod sila si Janice. Miliraw ang mga mata ni Janice. Dili siya makatoo kay hapsay kaayo ang kwarto ni Bert.

“Limpyado ka man diay nga pagkatawo Bert kay arrange kaayo ang imong kwarto, dili sama sa uban nga magkalat lang ang mga gamit,” ni Janice pa.  “Nakita mo bitaw sa pagdala nako sa akong uniporme, tikig kaayo nga inutaw g’yud dili sama sa akong mga kauban nga lawsi kaayo,” nanghambog og gamay si Bert.

Mipahiyom si Janice ug miparayeg kang Bert. “Ikaw ang lalaki nga gusto nako nga mahimong bana,” ni Janice pa dungan sa paghawok niini sa ngabil ni Bert. Wala magpapiri si Bert, giukoban dayon niya ang ngabil sa dalaga.

Dali ra kaayo nga naglami ang ilang pagparayganay. “Dili na g’yud kita mag-antus pa sa kalisud sa atong kahimtang sama didto sa sinehan Jan,” matud ni Bert. Gipakaligo dayon niya’g mga hawok ang dalaga.

Mainampingon nga giangkon ni Bert si Janice. Naligo sila sa singot tungod sa kainit sa kwarto nga duna lay electric fan. (Kataposan)