Goodbye is not Forever - Gula 71

Gigakos ug gigakos ni Vanessa ang unlan, ang aping gipiit sa pagdaitol sa dapit sa tumoy sa unlan samtang gisipitan niya ang dapit sa tiilan.

“Albert! oh! Albert!” nagkanayon si Vanessa nga wala sa hunahuna ang pagkasulti niini. Ingon sa nakalighot lang paglayas kadtong mga pulonga gikan sa iyang baba.

Taudtaod gyud siya sa maong kahimtang nga ingon sa nagsalimuang sa paghunahuna kang Albert. Karon ingon sa dihay kahinugon nga misikdo sa iyang kahimungawong. Nganong karon lang sila nagkita ni Albert? Nakapangutana si Vanessa sa hilom.

Unya mikalit lang siya’g timbakuwas pagkasiplat sa alarm clock nga gipatong ibabaw sa gamay’ng lamesita nga nagtug-an nga alas sayis imedya na sa gabii. Midali siya paggawas sa iyang kuwarto. Nagtapis lang siya’g tualya. Nakahunahuna siya nga maligo.

Misulod si Vanessa sa bathroom ug wala’y bisan usa na lang nga salimbong nga iyang gibilin sa iyang lawas. Mibulto sulod sa banyo ang maanindot niyang lawas nga nag-amag sa kaputi. Tuyhad pa gihapon og barog ang duruha ka bus-ok nga bungtod sa iyang dughan. Nindot ang pagkaporma sa iyang duha ka paa ug duha ka bitiis. Gamay ang iyang hawak. Ug mais-is uyamot ang iyang pamanit.

Giablihan gilayon ni Vanessa ang shower. Sa pagsirit sa tubig nga ingon sa mga ulan nga nangatagak sa iyang ulo ug lawas, si Vanessa gibati og kahilwas sa kaugalingon. -- Sumpayan pa