Si Konsehal Cinco

Sadya kaayo ang pista sa San Roque, Talisay. Daghan ang namista ug gani ang ubang mga tawo didto man magpunsisok daplin sa dalan nga nagpaabot sa street parade nga gisalmotan sa Girls ug Boys Scouts, mga kadagkuan sa balangay, mga mananayaw sa Sinulog, ug uban pa. May entablado nga giandam sa plasa alang sa parada ug niadtong buntaga gitahasan sab ni Kapitan Jun Cab ang matag konsehal sa balangay sa katungdanan sa himoong kalihokan.

Usa sa napili nga mosibya sa tulumanon mao si konsehal Agapito “Pitong” Cinco, ang way pilde-pilde nga konsehal sa balangay gumikan sa iyang kuwarta. Si konsehal Cinco igo lang nakatungha sa segundo grado apan sapian...!

Usa ka gabii, sa iyang diskurso sa entablado, siya nagkanayon:

“Maayong gabii Barangay Hall. Ako ra’y Pito nga nahimong Singko, ambot ngano kaha...!” Ug nangatawa ang nanambong mga botante.

Sa dayon nang sugod sa parade, mikuha sa mikropono si Konsehal Cinco ug misugod pag-pahimangno.

“Ang banda maoy mag-una sa parade. Kadtong mga Boy Scout nga babaye mosunod sa banda. Ang mga  Boy Scout nga lalake mosunod sab sa mga Boy Scout nga babaye. Alright..., everybody follow the bandage...!” Misiyaok ang pahimangno sa talamdong konsehal. Ang band leader nga wa kasabot sa pahimangno sa konsehal wa molihok ug wa sab motagubtub ang banda.

Unya, ang scout leader sa Laray National High School misinggit:

“Kaming mga bayot nga Boy Scouts, asa man ang among puwesto...?” Naglibog si konsehal Cinco ug nangutana sa publiko.

“May Boy Scout ba ang mga bayot...?” Nagkanayon ang pangutana sa konsehal. Inay motubag sa pangutana, mibuhagay hinoon ang katawa sa mga tawo hasta ang didto sa entablado lakip na si Barangay Captain JunCab. (Katapusan)