Matam-is ang Paghandom Gula 4

Dili g’yud buot ni Ely nga likayan si Shen apan iyang natimbang-timbang nga mahinungdanon kaniya ang iyang kinabuhi. Nakabantay si Shen sa kalit nga kausaban sa iyang boyfriend.

Usahay, magpasumangil na lang si Ely nga dunay gidalian nga trabaho ug dili siya makahatud ni Shen sa iyang apartment. Usa ka adlaw, subo kaayo ang dagway ni Shen nga miadto sa gitrabahoan ni Ely.

“Gikan ko sa doktor kay nabalaka ko nga wala na man ko abti sa akong mens…mabdus diay kuno ko Ly,” klaro kaayo nga kahilakon si Shen nga mipahibalo niini ngadto sa iyang boyfriend.

Gikulbaan ug wala mahinultol si Ely kun unsay iyang itubag. “Dili ko ikaw mabasul nga nagpalayo ka nako kay nahadlok ka nga panimaslan sa akong mga kadugo. Dili na ko motiwas sa akong pagtoon Ly,” matud ni Shen nga wala na gayud kapugong sa paghilak.

Gikan niadto, panagsa na lang nga magkita sila si Shen ug Ely. Hangtud nga miabut gayud ang higayon nga wala na magpakita kang Ely ang dalaga. Didto sa City Hall, nagkita ang maghigala nga Ely ug Philipp. “Wala nimo masugati si Shen pagpaingon nimo diri? Mao pa g’yuy paggawas ug may gibilin nga sobre para nimo kay mouli na kuno siya sa Tawi-tawi.”

Gibuksan ni Ely ang sobre ug nabantang dayon sa iyang panan –aw ang maanyag nga hulagway ni Shen. Matag karon ug unya, wala kapugngi ni Ely ang pagpanglingo-lingo samtang gibasa niya ang suwat sa iyang girlfriend.

“Mopauli na lang kuno siya sa Tawi-tawi bay Philipp kay aron dili siya maulawan sa iyang mga klasmet nga mimabdos,” ni Ely pa sa hinay’ng tingog.

Gipasalip-itan ni Ely ang hulagway ni Shen sa iyang libro. Kun abuton siya’g kamingaw kang Shen, iya kining sud-ongon. Milabay ang mga adlaw, may nadawat nga suwat si Ely gikan ni Shen.

Gitug-anan siya ni Shen nga gidagmalan siya sa iyang amahan tungod sa nahitabo kaniya. Wala magmahay si Shen sa iyang gidangatan sa mga kamot ni Ely. Nangandoy pa gani kini nga magkita sila pag-usab.

Gusto unta si Ely nga moapas kang Shen sa Tawi-tawi, apan sigurado siya nga dili buhion sa mga kadugo ni Shen kun mahibaw-an nga siya ang nakapamabdos sa dalaga.

Tulin nga milabay ang mga adlaw. Hapit na mosumad nga usa ka tuig dihang nagkaila sila si Shen ug Ely. Takulahaw lang siya nga nahinumdom sa dalaga dihang miaplay na usab siya’g Sinulog ID sa City Hall.

Gipangita ni Ely ang libro niya sa Mass Com nga didto niya gipasalip-itan ang hulagway ni Shen. (Sumpayan)