Swerte sa Bukid

Gula 5

Padayong nagbunok ang uwan didto sa bukid. Didto ra sila si Ruel ug Sandra sulod sa kotse.

“Makakita pa kaha ko og lalaki nga tinuod g’yud nga momahal nako Ruel?” gipangutana ni Sandra ang iyang higala. “Aw Oo, sigurado nga daghan ang magdagan ug gusto nga mopangga nimo Sand… usa na ako nila,” ni Ruel pa nga nagngisi.

“Tinuod ka Ruel? Andam ka nga mopangga nako? Uhaw ra ba g’yud kaayo ko og pagpangga kay dili g’yud ko pinangga sa akong bana kaniadto,” matud ni Sandra.

Wala g’yud maglangan og higayon si Ruel, gitangdo dayon niya si Sandra. “Yes, ang tinuod Sand, sa una nako nga pagkakita ganina didto sa usa ka restaurant sa Balamban, nabihag dayon nimo ang akong kasing-kasing.”

“Kanindot g’yud nimo manulti Ruel uy, da mabuang ko,” ni Sandra pa nga misugod na sa pagdikit kang Ruel. Nasabtan ni Ruel nga nadutlan si Sandra sa kabugnaw sa panahon ug gusto kini nga mobatyag og talagsaong kainit.

“I love you Sandra,” ni Ruel pa nga wala na maghuwat pa nga tubagon pa siya sa mestiza-insik. Giagbayan ni Ruel si Sandra ug anam-anam kini niya nga gigakus.

Wala mopalag si Sandra nga gigakus siya ni Ruel. “Pwede ba nga mo-kiss ko nimo Sand?” hagawhaw ni Ruel ngadto ni Sandra. “Mananghid pa g’yud na siya bisan pwerte na nga nakagakus,” matud ni Sandra sa paraygon na nga tingog.

Gihagkan dayon ni Ruel si Sandra. Sa unang higayon, nag-ukobay ang masi’g nila ka mga ngabil. Pinugngan ang ginhawa ni Ruel nga walay puas sa pagsige’g hawok sa nangalimyon nga si Sandra.

Wala damha ni Ruel nga mosukol kaniya og pagpakigparayganay si Sandra. Bisan og bugnaw kaayo ang panahon tungod sa walay hunong nga pag-uwan, apan nanginit ang masi’g nila ka kalawasan.

Daw gianod sila sa matintalong sitwasyon. Nagpanghiram na ang mga kamot ni Ruel sa seksi kaayo nga kalawasan ni Sandra. Ang gihimo ni Ruel maoy nagsugnib og kalalim ngadto ni Sandra.

“Ruel, Ruel, pagka paspas sa panahon,” hagawhaw ni Sandra ngadto sa bag-o niya nga boyfriend. Wala na makasabot si Ruel sa iyang gibati ning higayona.

“Hala, mituang na man diay ang uwan Ruel. Wala na ta makabantay,” matud ni Sandra nga gidunghayan sa singot. “Tuod no, sige akong ilisan ang fuel pump sa imong kotse,” ni Ruel pa sa dayon niyang kanaug sa awto nga nagbitbit sa flash light.

Misunod usab pagkanaug si Sandra nga mitunol kang Ruel sa yawe sa kotse aron mabuksan na ang tabon sa makina. Miagbay kang Ruel si Sandra. (Sumpayan)