St. John drug testing laboratory may gipaboran

Nobiyembre 6, 2012, alas 11:00 sa buntag. Nagpa-renew ko sa akong driver’s license sa Main Office, LTO nga anaa ra mahimutang duol sa South Bus Terminal, South Expressway ning dakbayan. Sanglit kabahin man ang drug test sa maong katuyoan, nagpatsek-ap ko sa akong ihi.

St. John Drug Testing Laboratory maoy akong gipili kay anaa ra man sulod mismo sa CITOM, LTO Compound. Puwerting inom nako’g mineral water aron masudlan dayon tong gihatag nga plastic bottle sa tig-assist sa mga kliyente. Taudtaod kong nagpaabot ayha pa ko makasumiter sa akong urine  nga medyo nadelatar sa paggawas. Milingkod ko’g balik sa silya samtang nagpaabot sa resulta. Apan naunsa ba, nga ang duha ka lalaki, kinsa ulahi pa nakong naabot, mao man hinuoy nauna?

Namatikdan nako nga ang usa ka lalaki may amigo nga giduol sulod sa maong buhatan. Gani, may dala man kining ihi daan. Ambot, iyaha ba kaha to? Kay puwerte gyud nakong bantay sa abiyento nilang rest room nga dugay’ng nabakante, wa gyud ko kita nga misulod sa CR tong tawhana. Ang ikaduhang tawo ig-agaw sab sa taga CITOM, kinsa mao gyu’y nangunay sa pagpaila-ila ngadto sa mga tagdumala. Awahi ra siyang nakabutang sa iyang urine didto sa may gamay’ng bentana, diin ko usab isumiter ang akoa. Yamat, iyahang ngalan man ang nauna’g tawag. Mibukal akong lana, uy! Mao ni klasehang kinaiya sa Pinoy nga kontra kaayo nako. Haskang asoha sa akong dugo!

Nangatarungan ang babayeng empleyada nga mas una kuno kadtong lakiha nga nakahatag sa iyang urine. Ay, nah...mibuto gyud ko: “Unsay una? Nga ako man? Klaroha ning inyong dinad-an namong mga kliyente, Day. First come, first served! Di kay last come, first served!” Mora lagi ko’g pari nga misermon.

Hinuon, nadali ra sab pagka-released ang resulta sa akong drug test. Pero the harm is already done. Nganong kitang Pinoy, dili man gyud ta makahatag og fair treatment sa mga igsuon nato nga atong gialagaran? Nganong kinahanglan pa man nga dukdukon ta aron matul-id?

Nganong sulod sa lawak sa St. John Drug Testing Laboratory may gipaboran man ang ilang empleyado? Primero pa ba lang kaha kadtong nahitabo nako, o kanunay na kini nilang gihimo?