Wala nay kaluoy

Dear Tita Salie,

Maayong adlaw. Ako si Vangie, minyo ug dunay 5 ka buok anak. Ang akong problema mahitungod sa among kaminyoon nga giguba sa akong bana.

Ako man god nga nasakpan ang akong bana nga dunay laing babaye. Gisakitan gyod ko pag-ayo, Tita, tungod kay perti gyod nakong paningkamot aron nindot ang dagan sa among pagpuyo. Bisan lisod akong buhaton aron lamang malipay ang akong pamilya.

Sakit kaayo, Tita, nga luyo sa akong pagpaningkamot iyang suklian og binuang. Duna pa gyod sila’y anak sa iyang babaye nga 1 ka buok. Sukad sa pagkahibalo nako sa iyang binuang nawad-an nako og gugma ug gana kaniya, Tita.

Mibalik siya diri sa among panimalay kay nangayo siya og pasaylo. Nagpakiluoy siya ug matud niya nga iya nang usbon ang iyang kinabuhi. Apan bisan unsaon nako wala na gyod ko’y gana kaniya ug wala na ko’y kaluoy nga ikahatag kaniya.

Ang akong mga anak nagsige og hangyo nako nga pasayloon na lang ang ilang amahan apan sa kasakit nga akong gibati maglisod ko og hatag sa ilang gipangayo.

Unsa may akong buhaton, tita? Palihog pasabta ug tabangi ko. Daghang salamat sa imong pagtagad. -- Vangie

* * *

Maayong adlaw usab kanimo Vangie,

Nasayod ko nga sakit gyod kaayo ang gibuhat sa imong bana. Dili man lalim ang impact niini diha kanimo tungod kay wala ka magdahom nga buhaton kini sa imong bana tungod kay isip asawa ug inahan sa inyong mga anak imong gibuhat ang tanan tungod ug alang kanila.

Pero nagahangyo usab ako kanimo nga hatagan lamang og bisan kataposan nga kahigayonan ang imong bana tungod ug alang sa inyong mga anak ug sa panahon nga kamo nagkauban. Bisan pa man kun lisod na alang kanimo ang pagdawat kaniya ug bisan sa pagpasaylo, pero ayaw kalimti ang kasakit sa atong Ginoong Jesukristo nga bisan patyon na siya iyang lang gihapon nga gipasaylo ang mga tawo nga gustong molansang kaniya. Kinsa man kita nga dili makapasaylo sa atong isigkatawo nga nakasala kanato?

Ako usab nga nakita sa imong bana ang iyang dakong gugma kanimo ug sa tibuok pamilya. Tungod kay bisan pa man kun nakauyab siya og laing babaye ug nakaanak pa sila pero nibalik lang gihapon siya kaninyo kay kamo ang tinuod niyang pamilya.

Iyang naamgohan ang sala nga iyang nahimo ug nasayod siya nga dili pa ulahi ang tanan. Busa nibalik siya kaninyo nga puno sa pagbasol. -- Tita Salie