Igo lang mipahiyom si Nang Gloria sa gisulti ni Amariah ug unya mitan-aw kang Albert. Ang ulitawo ingon sa wala lamang magtagad sa pangomedya ni Amariah. “Hoy,” giingnan ni Kezah si Amariah. “Duna nay nanag-iya kang Albert.”
“Bitaw,” dason ni Margo. “Tua sa Canada nag-work.” “Ulahi na diay ko!” Padayon ang pangomedya ni Amariah.
Nanghugyaw sila si pagpangatawa. Natakdan usab si Nang Gloria sa kalipay sa mga dalaga. Apan si Albert ingon sa wala gyud hidutli sa komedya ug pasiaw ni Amariah. Miapura hinuon siya nga manglakaw na sila.
Sa nakalakaw na ang grupo, si Nang Gloria milingkod sa sopa nga nahimutang sa sala. Nalipay si Nang Gloria nga mikuyog si Albert sa mga babaye nga kauban niini sa dihang nagtungha pa sila sa high school. Misantop sa iyang hunahuna nga usa kini ka paagi aron malingaw si Albert samtang atoa pa si Josheba sa Canada.
Alang kang Nang Gloria, dili makadaot sa relasyon nila ni Albert ug Josheba ang pagpakigkuyog sa iyang anak sa mga dalaga nga mga kauban niini nga iyang mga classmate kaniadto sa high school. Usa pa, nakaila si Josheba sa maong mga babaye. Ug nasayod na sila sa relasyon tali kanila ni Josheba ug Albert.
Nakapahiyom si Nang Gloria nga mao rang usa. Ang kalipay nga misaog sa iyang kaugalingon daw usa ka tambal nga makahupay sa balatian. -- Sumpayan pa