Ayaw’g hilak Roselyn

Malipayon kaayo ang mga estudyante sa hayskol didto sa barangay Sudlon. Ug gani sila si Roselyn, Marice ug Rowena napuno sa mga hudyaka kay birthday man ni Fernando nga ilang barkada. Sanglit kay barkada man nakakat-on usab sa pagmahal si Fernando ni Roselyn.

“Abi nimo Roselyn nahigugma gayud ako kanimo pag-ayo. Manghinaut ko nga dili nimo pakyason,” ni Fernando pa sa dalaga nga mapahiyumon.

“Fernando ayaw na lang pangandoy nako. Kay ang pagtan-aw ko kanimo hinigala lang. Ako pa nimo molayas na lang kay wala kay mapaabot gayud kanako,” tubag usab ni Roselyn nga nangyamiid kang Fernando.

“Roselyn moluhod na gyud ako kanimo sa imong atubangan  basta ang gugma kung gihalad dili mo gayud dawaton intawon karon.”

“Fernando, hala layas karon dayon. Kay bisa’g unsaon dili gayud mahitabo nga ikaw akong higugmaon. Tungod kay pobre ka nga pagka tawo. Ug wala ako’y maayong kaugmaon nga mapaabot kanimo kun ikaw ang lalake unya nga akong mabana. Nakasabot ba ikaw kanako Fernando?”

“Roselyn bisan sakit kaayo ang imong mga pulong. Gikalipay ko lang kini gihapon. Unsaon man ikaw raman gayud ang bugtong babaye ning kalibotan nga akong higugmaon. Tungod kay anaa man gayud kanimo ang paghukom, timan-i lang gayud Roselyn: Kung unsa ang gitas-on sa imong paglupad mao usab ang gitas-on sa imong pagkahulog sa kinaubsan,” matud pa ni Fernando nga gitamay gayud ni Roselyn ang pagkatimawa sa iyang pagkatawo.

Sa nanglabay mga adlaw ug mga bulan, hangtud miabot ang daghang mga katuigan. Gimingaw silang tanan ni Fernando kay nanimpalad man didto sa Manila kuyog sa iyang iyaan nga si Leonora nga usa ka kuwartahan.

Didto sa Manila si Fernando gihimo nga katabang ni Leonora nga iyang iyaan. Sa kaugalingon niining negosyo nga usa ka Sari-sari Store sa sulod sa merkado sa Caloocan City.

Tungod sa pagkakugihan gayud ni Fernando nga pagka tawo, misamot gayud ka asenso ang negosyo sa iyang iyaan. Kini na maoy tag-iya sa sulod sa merkado sa daghan niining mga negosyo. Anaay matansahan, sa mga karne nga baboy ug baka. Hasta usab sa mga karenderiya, mga tindahan sa mga sapatos ug panapton. Lakip na usab sa mga alahas. Mikalit lang usab sa pagkadato si Fernando. Kay gibahinan man gayud kini ni Leonora sa mga ganansiya, tungod usab ni Fernando nga iyang pag-umangkon nga maayo niining midumala.

Ug wala lang lagi tuyoa. Nahinumdom si Roselyn sa iyang gibuhat ni Fernando, sa pagbalibad niini kaniadto sa gihalad niyang gugma. Sa wala lang usab niya gayud damha, nabalitaan ni Roselyn nga operahanan ang iyang papa didto sa usa ka hospital sa dakbayan.

Tungod sa kasuod nilang Roselyn, Maricel ug Rowena, miadto sila sa tambalanan sa siyudad. Nagpaabot silang tulo sa resulta sa operasyon ni Ingko Ambo nga maoy amahan ni Roselyn.

Nakahilak ug nakabakho gayud si Roselyn sa dako niyang problema sa pagkawala gayud intawon niya’y kuwarta. Tungod lagi sa dako niyang kahadlok nga basin unya og mamatay ang biyudo niyang amahan kinsa gimahal gayud kini niya pag-ayo.

Unya sa tanto nilang pagpaabot sa resulta sa operasyon, daw giugbok ang tulo sa ilang gibarogan, pagkakita gayud nila sa doktor nga nag-uniporme og puti nga migawas sa bildo nga pultahan sa tambalanan. Si Fernando man diay ang doktor nga miopera sa himalatyon niyang amahan sa sakit niining kanser sa iyang baga.

“Roselyn luwas na si Ingko Ambo sa iyang kamatayon. Sulbad na usab ang mga problema mo sa bayranan ning tambalanan,” matud ni Fernando kang Roselyn nga malipayon kaayo.

“Oo, Fernando daw sa dili gayud ako makatuo sa mga panghitabo. Doktor na diay ikaw karon. Ug pasayloa intawon ako sa akong mga pagtamay kanimo kaniadto.”

“Ayaw na paghilak, Roselyn, kay ania ako andam na gayud mangasawa kanimo. Basta sugton lang gayud nimo,” tubag ni Fernando. (Kataposan)