Broken Heart Gula 7

Nakahilak si Stephanie nga naghandum sa mapait niya nga kasinatian sa gugma uban sa kanhi niya boyfriend. Si Japhet na usab ang miam-am sa nurse nga dili lang kaayo magpadala sa iyang kaguol.

Gihapuhap ni Japhet ang buko-buko ni Stephanie. Apan inay mohunong, mibakho na g’yud hinoon si Stephanie. Gitrapohan ni Japhet sa iyang palad ang luhaan nga mga mata ug ang mga aping sa nurse.

Wala na gayud makaantos pa si Japhet. Gigakus niya ang dalaga samtang nagpadayon kini sa pagbakho. “Ayaw na kaguol Steph. Tuguti nga panggaon ko ikaw ug akong ipasalig nga dili molubad ang akong pagmahal kanimo,” matud ni Japhet.

Padayong migakus si Japhet kang Stephanie. “Pareho kita Steph nga nakasinati og mapait nga kasinatian sa gugma mao nga tuguti nga tagboon nato ang atong mga pagbati aron sugdan nato ang usa ka malipayong pagminahalay,” ni Japhet pa.

Anam-anam nga miatubang si Stephanie kang Japhet. Luhaan gihapon ang iyang mga mata ug gitrapohan na usab kini ni Japhet pinaagi sa iyang palad. “I love you Steph,” matud ni Japhet dungan sa pagpaduol og anam-anam sa iyang mga ngabil ngadto sa ngabil sa nurse.

Takulahaw lang nga nag-ukobay ang masi’g nila ka mga ngabil. Migakus si Stephanie kang Japhet. “I love you too Japhet,” matud ni Stephanie nga milingi sa pultahan. Mitindog si Japhet ug gi-lock niya ang siradora sa pultahan.

Mibalik si Japhet sa nahimutangan ni Stephanie ug gipadayon nila ang pagparayganay sulod sa private room sa ospital. Nagbutok-butok ang dughan ni Japhet nga sa kataposan, naangkon ra gayud niya ang gugma sa nurse nga iyang naibgan.

Gipatagamtam niya kini sa makabuang nga mga parayeg. Gialsa niya si Stephanie ug gipahimutang sa katre sa ospital ug didto padayon niya nga giparaygan. Gigilkan si Stephanie sa bungot ni Japhet.

Wala niya kalikayi nga nakapahiyom si Stephanie ilabi na nga nakahinumdom siya sa gisulti sa kauban niyang nurse nga dili siya magmahay kang Japhet kay batid kini sa pagpagilok ug pagdala’g palami sa kama.

Karon andam na si Stephanie kun unsay sunod nga mga panghitabo. Nasuta niya ang kamatinud-anon ni Japhet. “Magpakasal ta Steph kun makagawas na ko dinhi sa ospital apan dili na ko gusto nga mupadayon ka sa pagka nurse,” matud ni Japhet.

Gipadayon nila ang mas mainiton pa nga pagparayganay…. Imbis mopahuway, apan gibudlay nila ni Japhet ug Stephanie ang ilang kaugalingon sulod sa tinak-opan nga lawak. Duha ra ka adlaw si Japhet sa ospital.

Wala mapakyas si Stephanie kay gituman g’yud ni Japhet ang iyang saad. Gipahikay dayon niini ang ilang kasal. (Kataposan)