Broken Heart

Gula 6

“Uy, nakatagpilaw man diay ko’g gamay Step,” matud ni Japhet nga midali-dali og timbakuwas gikan sa iyang gihigdaan. Nanaug si Japhet ug mipaingon sa pansayan. “Dili na lang tika ubanan Japhet ha?” matud ni Stephanie.

Pagbalik ni Japhet wala na kini mobalik sa paghigda. Mitupad kini paglingkud ni Stephanie sa taas nga lingkoranan. “Dili ka ba mopauli karon?” gisukna ni Japhet si Stephanie. “Dili. Basta kuhaon gani kami nga special nurse, ubanan namo ang pasyente kanunay,” matud sa nurse.

Taud-taud nga nahilom si Japhet, wala kini magtingog. “May gihuna-huna ka ba Japhet? Naghinuktok ka man gud,” matud ni Stephanie. Dugay nga mitubag si Japhet ug nagpadayon kini nga nagduko.

“Gihuna-huna lang nako ang imong gisulti kaganina Step nga basin muabot ra ang adlaw nga makakita ra ko og babaye nga matuod nga magmahal nako,” ni Japhet pa sa hinay’ng tingog. “Bitaw Japh, sigurado g’yud nga daghan pa nga babaye nga momahal kanimo sa matuod,” ni Stephanie pa.

Mitindog si Stephanie ug mikuha’g labakara. Iya kining gitumog sa tubig didto sa banyo ug gipug-an. Gitrapohan niya ang nawong ni Japhet. “Ingon ana ka diay moatiman sa imong pasyente Step?” nakapangutana si Japhet kay karon pa siya makasuway.

“Sa miaging tuig, nagpa-admit usab ko dinhi apan ang akong special nurse wala ko niya giatiman og sama sa imong gihimo,” matud ni Japhet. “Kabahin kini sa among serbisyo Japh kay kinahanglang limpyo ang among pasyente,” ni Stephanie pa.

Gitrapohan ni Stephanie ang nawong, liog, bukton, dughan ug buko-buko ni Japhet. Presko kaayo ang pamati ni Japhet. Wala siya makasabot sa iyang gibati. Dihang mitupad kaniya paglingkud si Stephanie.

“Abi nimo Step, kadtong adlaw nga una kita nga nagkita, migitib dayon sa akong dughan ang usa ka pagbati alang kanimo mao nga ikaw ang gusto ko nga ikauban sa akong pagpa-admit dinhi sa ospital. Karon, hingpit na gayud nga milipang ang maong pagbati,” ni Japhet pa nga buotan kaayo’g tingog.

“Japhet?” halos wala’y pulong nga mogawas sa baba ni Stephanie. Wala siya magtuo nga panguyaban ni Japhet. “Lauman nako Step nga imong imatuod ang imong giingon nga duna pay babaye nga matuod nga momahal kanako. Wala na ako’y kabilinggan,” matud ni Japhet.

“Abi nimo Japh, nahadlok na ‘sab ko nga makig-relasyon og lalaki kay nakatilaw na ko’g kapakyasan dihang nakigminyo og lain ang akong boyfriend. Mora ko og mamatay sa kaguol tungod sa maong hitabo,” ni Stephanie pa nga misugid sa iyang kaagi.

Mitutok si Japhet kang Stephanie nga nagduko nga luhaan ang mga mata. (Sumpayan)