Dear Tita Salie,
Have a nice day and I hope that you are always in good health. By the way, tagoa lang ko sa pangalan nga Mr. D, from Cebu, I’m already married ug dunay 1 ka anak sa akong asawa.
Pero, subo kaayong palandongon nga minyo ko apan wala mi magtipon og puyo sa akong asawa. Hangtod nga miabot gyod ang panahon nga nagbulag gyod mi ug among naguba ang among mga saad diha sa altar sa kaminyoon.
Karon duna ko’y laing babaye nga gikatipon ug nanganak kami og usa. Apan ako man nga naamgohan nga lahi man gyod ang akong feeling kun ang akong tinuod nga asawa ang akong kauban sa kinabuhi. Lahi man gyod ang akong na feel sa akong asawa kun akong itandi sa akong gikatipon karon. Nahigugma man god ko sa akong tinuod nga asawa.
Mao nga gusto unta ko nga makigbalik sa akong matuod nga asawa (ang original) apan maglisod nako paghimo niini tungod kay duna na may gikapuyo ang akong asawa nga usa ka langyaw. Naglibog ko, Tita, kun unsay akong buhaton. Pero gusto gyod unta ko nga mabalik ang among pamilya. Unsa may angay nakong buhaton, Tita Salie? Palihog pasabta ko. Thank you so much sa imong tubag. More power and God bless. -- Mr. D.
* * *
Maayong adlaw, Mr. D.,
Kumplikado na kaayo ang inyong kahimtang karon tungod kay aduna kanay anak sa laing babaye aduna nay gikatipon ang imong asawa nga tinuod.
Apan kun balaod ang atong sundon, tungod kay kasado man gyod mo sa imong asawa, ikaw gyod ang may katungod kaniya ug siya usab ang mas may katungod kanimo. Puyde kang mogukod sa imong asawa tungod kay duna gyod siya’y ebidensiya nga duna kay laing babaye kay aduna man kamoy anak. Puyde usab nimong magukod ang imong asawa kun diskompyado ka ug makasohan ang imong asawa.
Pero kun gugma na ang hisgotan dili na ko sigurado kun aduna pa bay paghigugma ang imong asawa kanimo. Puyde nimo siyang kasohan apan dili nimo siya mapugos nga makigbalik kanimo kun siya wala nay gusto.
Ang maayo nimong buhaton mao nga mangita ka og paagi nga imong ikasulti ang imong asawa bahin niini. Imong isulti kaniya ang imong intention nga balikon ang inyong pamilya. Tingali diay kun ikaw lang gihapon ang gipitik sa iyang kasingkasing ug dili na unya lisod kanimo ang pagbuhat sa imong plano. -- Tita Salie