Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Kahinumdoman nga ang barkong Doña Paz nga gipanag-iya sa Sulpicio Lines Inc. natundag kaniadtong Disyembre 20, 1987 sa kadagatan sa Mindanao sa dihang nabangga kini sa laing barko nga mao ang M/V Vector nga may karga nga gasolina ug krudo. Sa 4,000 kapin ka pasahero, 24 lang ang naluwas. Usa kadto ka masakit ug makalilisang nga trahedya sa kadagatan dili lamang sa mga hingtungdang kabanay.
Taliwala sa malinawon unta nga pagpanaw sa kapin 4,000 ka pasahero luwan sa maong barko, kalit lang nga nagkaguliyang sa dihang milugan-ob ang barko ug unya gisundan sa makalilisang nga pag-ulbo sa kalayo kay mibuhagay ang gasolina ug krudo sa duha ka barko nga misangpot sa pagka-sunog sa Doña Paz. Ang kadagatan sa Mindoro diin nagkabangga ang duha ka barko kaniadtong Disyembre 20, 1987 naingon og impiyerno, mora’g ang Gomorra ug Sodoma nga gisunog sa Dios tungod sa di na mabang-bang nga pagpakasala sa mga tawo sa maong dapit.
Ang panagbangga sa duha ka barko dili tinuyo. Tingali, tungod sa kadanghag sa duha ka kapitan. Sa kalapad sa dagat nganong magkabangga man? Gawas pa niini, adunay signal light ang barko sa nagkalainlaing kolor sa suga aron mahibaw-an kun asa ang ilang puntariya. Tingali kaha, ang mga kapitan nagkalingaw og inom sulod sa barko samtang naglawig kini, o kaha gipadala sa mga aprentice hinungdan nga wa magkadimao ang dagan sa barko.
Aron unta pagluwas sa ilang tagsa-tagsa ka kinabuhi, nag-iyahay pagpanglayat ang mga pasahero ngadto sa dagat. Inigtunga nila aron unta sa pagginhawa ang nagdilaab hinuon nga kalayo maoy mosugat kanila. Grabe kaayo ang pag-antos sa mga pasahero. Gawas nga nangalumos sila nangapaig pa gyud ang ilang kalawasan. Ang tanang tripulante sa Doña Paz nahurot pagkamatay.
Kahinumdoman, ang barkong Titanic natundag sa kadagatan sa North Atlantic Ocean kaniadtong Abril 14, 1912 nga mikalas og 1,517 ka pasahero. Dili tungod sa bagyo kun dili, nabangga kini sa iceberg kon yelo. Kadaghanan sa mga pasahero mga adunahan naglakip kang John Jacob Astor, usa ka milyonaryo ug ni Leidor Straus, tag-iya og department stores. Ang Titanic, matud pa, the largest and most luxurious ocean liner of its time. Sa labing una niyang panaw gikan sa Southamton, England, paingon sa New York City, nalunod kini sa dihang nabangga sa iceberg. Ang kapitan sa Titanic nga si Edward J. Smith, mitala sa gikusgon nga 21 knots (nautical miles per hour) ug mihimo unta pagkontrolar sa gikusgon sa barko sa dihang iyang nakita sa unahan ang iceberg, apan ulahi na ang tanan kay nabangga kini sa iceberg ug nabuslot ang duha ka compartments sa maong barko hinungdan sa pagkalunod niini.
Ning panahon sa Pasko kon Christmas season daghan kaayong bakasyonista nga mopauli sa nagkalain-laing dapit ning atong kapupud-an. Dili nato taligam-an ang mahinungdanong mga pointer diha sa pagbiyahe, magbantay sa mga kawatan, tulisan, snatcher, holdaper, kriminal, mangingilad, mangunguot, ubp. nga manayming sa ilang biktimahon kasagaran diha sa mga pantalan ug terminal. Labaw sa tanan ang pagpaniid gayod sa kahimtang sa panahon aron makalikay sa mga trahedya ilabi na gyud diha sa kadagatan.
Kanang mga dagkong bawod taliwala sa lawod pintas kaayong tan-awon, apan inig-abot niya sa lapyahan madugmok kon mapusgay agi’g bayad sa mga kadaot nga iyang nahimo.