“Wa na koy problema sa panaglagyo namo ni Josheba Brod,” malipayong taho ni Albert sa iyang higala. “Nakaseguro na ako nga mopauli gayod siya dinhi ug magpakasal kami.”
Wala motingog si Eking. Igo lang kining mitutok kang Albert.
Tugob sa kadasig ug kasadya ang panagway sa batan-on. Una niyang giipisan ang iyang baso ug gisunod ang baso ni Eking. Ug human ipingki ang ilang mga baso, nagdungan sila pagyarok sa beer nga sulod niini.
Samtang nag-inom, nagkadaiyang mga butang ang nahimong tema sa ilang hilisgotan. Milungtad og dugay ang ilang pag-inom. Hangtod nga nanginit na ang ilang dalunggan.
“Aduna koy mahinungdanong isulti kanimo, Brod,” namulong si Eking sa kapormal sa panagway. Gipatuyok-tuyok niini ang baso sa ibabaw sa lamesa.
“Mahitungod sa unsa?” Gitutokan ni Albert ang iyang higala.
“Mahitungod niadtong akong gisugyot kanimo.” Laktod nga tubag ni Eking.
“Kay ngano man diay, Brod?” ni Albert pa. Miginhawa una og lawom si Eking una motubag. “Kun imo kadtong gibuhat kang Josheba, Brod, dili na tingali ko pakatulgon sa akong tanlag.”
“U-unsay buot mong ipasabot, Brod?” Mikunot ang agtang ni Albert. -- Sumpayan pa