Gustong dad-on

Dear Tita Salie,

Good day. Just call me Ms. Leo, 20 years of age, duna ko’y anak apan dili pa minyo tungod kay wala pa mi makasal sa amahan sa akong anak. Pero ania ako nagpuyo tipon kanila uban ang akong anak.

Sa tinuod lang dili gyod ko malipayon karon sa akong kahimtang. Ako mang namatikdan nga walay gusto nako ang inahan sa akong kapuyo, Tita. Kanunay ra ko nga padunggon og mga sulti nga dili maayo, mga sulti nga sakit gyod sa dughan. Apan ang tanan ako lang gibalewala ug gipalabay sa pikas dunggan kay dili ko gusto og gubot.

Ako usab nga na obserbahan sa akong bana nga mora og iya nakong giluagan. Dili na siya concern nako. Wala na gani siya mointriga sa iyang sweldo diri nako. Ug magsige na lang pod mi og away kay magduda man ko nga duna na siya’y lain nga gikabuangang babaye. Pero ako lang gipasensyahan, basta ang importante lang dunay makaon ang akong anak.Karon, Tita, niari ang akong mga igsoon ug gusto ko nilang dad-on. Gusto nila nga ako na lang biyaan ang akong partner. Pero maglisod man ko pagbiya kaniya kay love man nako siya. Sakit alang nako ang biyaan siya. Naglibog gyod ko, Tita. Unsa may ilhanan nga nagbinuang kanimo ang lalaki? Palihog pasabta ko. Daghang salamat sa imong pagtagad. -- Ms. Leo

* * *

Hello, Ms. Leo

Mas maayo siguro nga fair ka sa imong kasingkasing aron walay magmahay. Imong hatagan og panahon nga makig-areglo sa imong partner. Imong klarohon kaniya kun unsay plano niya sa inyong gugma. Pangutan-a siya kun duna pa ba siya’y gugma kanimo. Ingna siya nga love kaayo nimo siya apan maglisod ka sa imong kahimtang nga nitipon sa iyang pamilya.

Ingna siya kun nahigugma siya kanimo agniha siya nga molain mo pagpuyo bisan kun mag-abang lang una mong duha. Kay mas nindot puy-an ang balay bisan kun kini gamay basta puno sa pagminahalay. Unsaon man kanang dakong balay pero kanunay mo nga nag-away, tungod kay walay respeto ug pagsinabtanay.

Ipatubag ang tanan nimong pangutana agi’g respeto sa imong gugma kaniya. Pero kun imong masuta gikan kaniya nga wala siya’y plano alang kaninyo, ayaw paglangan, panghipos sa imong mga gamit ug kuyog sa imong mga igsoon. Agwantaha ang sakit nga kausa na lang mahitabo og likayi ang kasakit ug kapait sa pagpuyo uban nianang tawo nga wala mahigugma sa tinuoray kanimo.

Siguro dili na siya magmahay kun imo siyang biyaan tungod kay imo man siyang gihatagan og higayon nga mosulti sa iyang side. Ug dili kana usab mahayan sa imong kasingkasing tungod kay imo pang gisuwayan og save ang inyong  gugma pinaagi sa pagpangutana nimo sa imong partner. -- Tita Salie