Dapit sa nahitaboan

Duha ka babaye, puro dalaga, manag-agaw pa gyud, nagbugno tungod sa libak-libak. Nagsagpaay, naglabnotay og buhok sila si Rina ug Edna duol sa tindahan ni Andresa sa baryo Hungot. Hapit natangtang ang wala nga dunggan ni Edna kay gipaak kuno ni Rina. Tungod sa samad ni Edna sa dunggan, nipasaka siya og kaso nga less serious physical injuries batok ni Rina.

Wala’y nanistigos nga mga nakakita sa ilang away. Kay wa gyud kunoy nakakita sa pagpaak ni Rina sa dunggan ni Edna. Ug gawas pa, wa sila’y gidapigan sa manag-agaw. Dili gusto ang mga silingan nga magdako ang ilang away. Ang gibasihan sa pagsang-at sa kaso, ang pahayag ra gyud ni Edna nga gipaak siya ni Rina. Kay duna man gyu’y samad ang dunggan ni Edna nga mora gyud og agi sa ngipon sa tawo, naarestar gyud si Rina. Nipiyansa ug niabutang.

Sa dihang higayon na ni Rina nga mopresentar og ebidensiya sa iyang depensa, giimbestigar siya’g maayo sa iyang abogado mismo nga si Atty. Santos Oliodo. Iya gyung patug-anon sa tinood iyang kliyente kun gipaak ba gyud niya ang biktima. “Kun gipaak pa nako si Edna matangtang gyud tingale ang tipik sa iyang dunggan. Sama sa nahitabo ni Hollyfield nga gipaak ni Tyson. Apan naa ang Diyos sa langit, attorney. Wa gyud ko na siya paaka. Kay kun gipaak pa nako, muangkon ko sa akong sala. Unya mobayad ko’s gasto niya sa pagpatambal” ni Rina. Seryoso ug matinud-anon nga nisulti sa iyang abogado sulod sa bupete sa naulahi. Nitutok gyud ang kliyente sa mga mata sa iyang abogado aron pagpatuo nga wa gyud siya namakak. Nakapanghupaw ang abogado. “Pag-una lang sa husgado, kay duna pa ko’y hapiton” sa abogado ngadto sa iyang kliyente. Alas siyete pa ron sa buntag. Alas otso imedia pa ang bista.

Nakahukom si Atty. Oliodo nga muadto sa lugar sa nahitaboan. Pag-abot niya sa tindahan ni Andresa, nakita niya nga nag-atubang sa karsada ang maong tindahan. Dapit sa tuong eskina sa bungbong sa tindahan, dunay lantay nga kawayan nga porma og letrang “L”. Duha ka dupa ang gitas-on sa lantay niuyon sa tuong bungbong sa tindahan. Duha sab ka dupa ang gitas-on sa lantay nga niuyon sa atubangang bungbong sa tindahan. Sa distansiya nga tunga’s dupa gikan sa tumoy sa lantay sa tuong habig sa bungbong sa tindahan, dunay dakong punoan sa mansanitas. Sa unom ka tiil ibabaw sa yuta sa punoan sa mansanitas, dunay dagkong sanga nga niporma’g panga. Tunga-tunga sa pa nga may kawayan nga gibad-ay mora’g bukton sa tawo kadaku. Gikan sa masanitas, ang kawayan nagbabag nga may lima ka dupa ang gitas-on. Gilansang ang tumoy sa kawayan ngadto sa luyong bungbong sa tindahan. May unggoy nga naglatay-latay sa kawayan. Gibaksan og panit ang unggoy. Ug ang bakus, may kadena nga gitakod sa lingin nga puthaw nga daw pulseras nga luag sa bos sa kawayan. Makadagandagan ang unggoy subay sa kawayan gikan sa mansanitas ngadto sa tumoy sa kawayan luyo sa tindahan. Daw duha ka tiil ang gitas-on sa kadena sa bakus sa unggoy. Daw singko anyos nga bat ang gidak-on sa unggoy.

“Dako’g posibilidad nga unggoy ang nakapaak ni Edna. Kay matud pa ni Rina, diha sila naghuman og bugnoay sa punoan sa mansanitas!” tuaw ni Atty. Oliodo sa hilom.

Sa pagsulti ni Rina sa husgado nga di gyud siya ang nagpaak ni Edna, gipasangil niya sa unggoy. Nihangyo siya nga pasultihon si Andresa nga maoy tag-iya sa unggoy, kun unsa ang nahimutangan sa unggoy. Tungod sab kay way nisuportar sa pamahayag ni Edna nga gipaak siyang Rina, naabswelto si Rina sa kaso. Kay matud pa ni Judge Nilo Arbor, dunay duda nga ang unggoy maoy nakapaak ni Edna. Dili makonbikto ang akusado, kay ang ebidensiya nga makapakonbikto, kanang ebidensiya nga way gamay’ng duda o reasonable doubt.

Dihang nabasahan na si Rina sa hukom nga absuwelto siya, nihilak si Edna. Ug nangayo’g pasaylo ni Rina. Nga tungod lang sa iyang kalagot, iyang gipasangil ni Rina ang pagpaak sa unggoy. Nagpinasayloay ang manag-agaw human sa kaso. Kay bisa’g unsaon, di man mawala ilang pagkaparyente. Nag-ilog sila’g textmate. Nakapahiyom si Atty. Oliodo.

“Dako gyud og ikatabang sa abogado ang pagbisita sa lugar sa nahitabo” tuaw niya sa hilom. (Sa gusto’g libreng konsulta, dad-a ning pahina sa sugilanon sa opisina sa tagsulat, sa Sabado’s buntag)