Trial marriage

Dili ni puwede notaryuhan inyong Memorandum of Agreement. Aw, ang akong ipasabot, di ko mo notaryo ini. Sekreto ni ninyong duha. Ug kun duna moy pahibaw-on, unya mangutana kinsay naghimo ining kasabutan, ayaw isulti nga ako. Dili sab ko moangkon nga ako’y naghimo. Kay dilikado ma-disbarred o masuspenso ang abogado nga mamatud-an nga maoy nihimo ini ni Atty. Terence Randori. Nakighinabi siya karong buntaga sulod sa iyang bupete sa baryo Lukay. Naglingkod atubangan niya sa duha ka tumoy sa lamesa iyang mga kliyente. Dapit sa wala naglingkod si Irving. Sa tuo atbang ni Irving si Ayla iyang uyab. Human na sila’g pirma sa kontrata nga gi-review pa ni Atty. Randori. Nakauyon sila sa mga kondisyones. Maong gipirmahan dayon nila kay mao gyud ang ilang gustong mahitabo sa ilang relasyon.

Manag-uyab sila’s Irving ug Ayla. Si Irving usa ka doctor. Si Ayla usa ka nurse. Usa ka tuig na ilang relasyon. Nagtrabaho sila sa Ginit General Hospital. Gusto sila mag-live-in na. Unya nagkasabot nga sa di pa sila mag-live-in, magpirmahanay sila’g kontrata. Ilang gikasabutan nga ang ilang tagsa-tagsa ka suweldo, ila ra. Apan tunga sila sa tanang gastohan sa pagpuyo sama sa ilang kunsomo sa pagkaon, tubig, kuryente, telepono, mga gamit sa panimalay ug abangan sa balay. Kun manganak sila, mopirma og dokumento si Irving sa pag-ila ug pag-angkon nga  siya ang amahan sa bata. Tulo lang ka tuig ilang kontrata. Inig human sa tulo ka tuig kun magkasabot silang magbuwag, puwede ra. Basta ang bata suportahan gyud sa amahan. Anha ang bata sa inahan puyo apan may katungod ang amahan sa pagbisita matag-karon-ug-unya. Paghuman sa tulo ka tuig, kun makahukom silang magpakasal na gyud, magpirmahay sila og kasabutan, kanang gitawag og pre-nuptial agreement.

“Maayo ug practical kaayo ning inyong gibuhat. Mao ni gitawag alang nako nga usa ka realistic approach to the relationship”  ni Atty. Randori nga mapahiyumon. Nitunol ngadtong Irving sa kontrata nga balig duha ka pahina ug unom ka kopya. Gidawat ni Irving ug gibahig ang mga papel. Gihatag niyang Ayla ang tulo ka kopya. Gidawat ni Ayla. “Mahimo ba’g mangutana ko nganong gibuhat ni ninyo?” sa abogado. Motabi unta si Ayla. Apan nisinyas siya ni Irving nga paunaho’g sulti. “Sakto man imong giingon attorney. Practical. Kay gikan man gud ko sa broken family. Di nako gusto masinati ang nahitabo sa akong mga ginikanan,’ ni Irving. “Ako sab attorney, akong mga ginikanan nag-live-in lang. Usa ko sa anak. Unya nagbuwag. Way tarong kasabutan” ni Ayla. “Bilib ko ninyo. Kay kadaghanan man gud, anha man gyud mangguwa ang tinuod nga kinaiya sa tawo kun makapuyo na nimo” ni Atty. Randori. “Unya kun magpakasal dayon, hasol na kaayo ang pagpaanular” ni Irving. “Practical gyud mi, attorney. Kay di man matag-an, dangtag pila ka tuig namong puyo, magkapul-anay mi. Maayo nang way away. Prangkahay dayon. Malinawon nga magbuwag” ni Ayla. Nanindog ang manag-uyab. “Well, good luck to both of you”, ni Atty. Randori. “Best wishes to both of us” ni Irving. Mapahiyumon. “Best wishes” ni Ayla. Mapahiyumon sab. Naggakos sila. Naghawok. Dugay’ng nag-akob ilang mga ngabil. “Salamat, attorney” ni Irving. Nilamano sa abogado. “Thanks, attorney” ni Ayla. Nilamano sab sa abogado. “You’re welcome. My pleasure” ni Atty. Randori. Nagpahiyom gihapon siya nga nisunod og tan-aw sa manag-uyab nga sweet kaayo nag-holding hands nga naglakaw padulong sa pultahan sa bupete.

Dangta’g tulo ka tuig, bisita na sab niya sila’s Irving ug Ayla. Karon magpahimo na gyud sila og pre-nuptial agreement. Nakaanak na sila’g usa. Ug hugot na gyud kaayo ilang relasyon. Andam na sila nga matiguwang sa kiliran sa usa’g usa. Nakapakpak si Terence sa kalipay. Nalipay siya alang nilang Irving ug Ayla. Ug sa ilang anak ug sa umaabot pa nilang mga anak. Gipalingkod niya ang kaslunon samtang nagpanday siya sa Pre-nuptial Agreement o kasabutan sa di pa ang kasal. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag).