Adventure sa lolo ug apo

Nahimong baby sitter karong buntaga si Doming sa iyang apo nga si Hera, dos anyos. Tungod kay ang lola nga si Beleng nga mao gyu’y kasamtangang yaya sa bata, nagpa-renew sa iyang driver’s license. Diha sa Food Court sa SM City, Mabolo, gipahuwat si Doming.

Ang managtiayon, puro retirado nga magtutudlo sa saring publiko. Ikaduhang apo nila si Hera. Ang panganay si Lovie, 7 anyos. Nagtungha na sa grade one. Kasamtangang tua sa eskuylahan. Kuhaon sab to nila inig ka alas 4:30 sa hapon. Nia sa LTO, SM Mabolo nagpa-renew og lisensiya ang lola. Alas 9:30 sa buntag diha na sila sa level 3 nga parkingan sa SM.

Naglibog ang lolo kun unsaon paglingaw ang iyang apo. Mga tulo ngadto’s upat ka oras ra ba ang gidugayon sa pag-renew sa lisensiya. Motutoy pa ra ba sa inahan si Hera kay gi-breast fed man. Unya ang inahan kaadlawon pa nigikan kay nagtrabaho sa Call Center. Alas 4:00 sa buntag ngadto’s alas 12:00 sa udto iyang work shift. Ipon pagpuyo nila si Daphne bisa’g minyo na. Iyang bana nga si Jude magtutudlo sa Carmen National High School. Sayo sang mogikan kay naa man sila’s Guadalupe namuyo.

Nag-estambay kadiyot ang lolo ug apo sa Food Court. Wa nagdugay niyamar ang bata.

“Sakay! sakay! sakay! matud sa bata. Nahinumdom si Doming nga sa panahon nga ang ginikanan maoy modala sa bata sa SM, pasakyon nila’g higanteng stuff toy nga modagan. Ubanan hinuon nila’g sakay.

Niduol ang lolo kinugos ang apo sa dakong iro-iro nga modagan.

“Bayente pesos lang ang abang, Sir, diyes minutos ang sakaysakay,” sa bayongbayong nga tigbantay sa duwaan.

“Niay 40 pesos, Dong o. Balig bayente minutos,” ni Doming. Gidawat sa batan-on ang kuwarta.

Lipay kaayo si Hera nga gipatong sa bukobuko sa iro-iro.

“Di man kaabot ang tiil sa bata sa tindakanan nga pedal aron pagpadagan sa iro-iro. Sakay lang og apil,  Sir” sa batan-on.

“Di lang ko, Dong” ni Doming. Maulaw siyang mosakay sa duwaan sa bata, sa iyang hitsura ug pangidaron. Ug  nahalingi siya dapit sa tuo. Dunay mga push cart nga mora’g porma og dyip o kotse.

“Adto lang mi didto, Dong,”ni Doming. Giuli sa batan-on ang kuwarta ngadto sa tiguwang.

Gipahimutang dayon ni Doming si Hera sa push cart nga pula nga porma og kotse. Nindot ni kay bisa’g pila ka oras pa niyang tulodtulod, malingaw ang bata. Ug di siya kapuyon og kugoskugos.

“Tag 60 pesos ang abang sa push cart, Sir. Bali’g usa ka oras. Unya kinahanglang ibilin imong valid ID ug deposito nga cash P100” sa batan-ong babaye nga tigbantay.

Way valid ID si Doming. Nahibilin iyang lisensiya sa glove compartment sa ilang serbis nga Isuzu Crosswind. Di man siya gustong masipyat nga makadrayeb nga way lisensiya. Wa man sila’y laing sakyanan. Wa gyud niya ibuwag iyang lisensiya sa sakyanan. Nihangyo siya nga depositohan niya’g usa ka libo ka pesos. Wa gyud misugot ang babaye. Gigutom na lang si Doming. Kay usa ka kamoteng gamay lang iyang pamahaw.

Gidala niya si Hera sa Pizza Hut nga mora’g rolling store sa lobby sa SM. Nipalit siya’g duha ka hiwa nga pizza pie sa presyo nga P55 ang duha. Namalik sila sa Food Court. Gikaon ni Doming ang usa ka hiwa nga pie. Gihatag niya ngadtong Hera ang laing usa ka hiwa. Nakahurot ang bata og katunga. Gihurot ni Doming ang sobra sa bata.

“Susot! Susot! Susot!” matud ni Hera. Ang gipasabot sa bata nga matulog na siya. Nangayo siya’g tsupon. Gikuot dayon ni Doming ang tsupon nga pinutos og lampin sa tuong bulsa sa iyang maong nga karsones. Gidawat sa bata ug gitutoy ang plastic nga tsupon. Gihapin ni Hera sa iyang dughan ang lampin. Gikugos ni Doming ang apo ug gikantahan og mga ballad. Dihang nakatulog na ang bata, nilingkod si Doming. Gipahigda niya ang bata sa iyang sabakan.

Daghang mga tawong molingi ug di kalikay nga mosud-ong sa tiguwang lalaki nga nagsabak og batang babaye nga natulog. Daw di sila katuo nga ang tiguwang lalaki kamao mopakatulog og bata. Nakatawa sila. May mga tiguwang babaye nga makapahiyom magsud-ong sa lolo ug apo. Nakadayeg sila sa hilom ining usa ka lolo nga nag-baby sitter sa apo. Nakapahiyom na lang sab si Doming. (Kataposan)