Paraygon nga Engkanto

Gula 1

Nabaniog pag-ayo sa mga drayber sa “habal-habal” nga mag-agian sa mingaw nga karsada didto sa Sitio Pungtod, sakop sa Barangay Lambusan, San Remigio nga dunay babaye nga mag-atang daplin sa karsada kun mohapit na tungang gabii.

Diha gani usa ka higayon nga maayong pagkabagnos sa karsada sa usa ka drayber og motorsiklo kay wala na siya mahinultol sa pagpadagan kay mikalit lang og guho ang babaye daplin sa kasagbotan samtang siya hinay nga nagpadagan.

Dili maayo ang karsada inig saylo na sa taytayan sa Barangay Tambongon. Ang taas nga taytayan nga ang ilawom dagat maoy gihimong utlanan sa duha ka barangay. Habig sa Barangay Lambusan, ang tumoy sa taytayan nahimutang dili halayo sa mga pangpang nga nag-umbaw sa dagat.

Dagko nga mga kahoy ang miturok sa kilid gayud sa pangpang nga ang mga dagkung sanga nag-umbaw sa dagat. Wala g’yuy nagpakaisog sa pagputol sa maong mga kahoy kay nakadungog sila og estorya sa mga karaang lomulupyo nga ang maong mga kahoy gipuy-an kini sa mga engkanto.

Usa ka lomulupyo sa Lambusan misaysay nga ang iyang anak-dalaga kaniadto gipangulitawhan og puti kaayo nga lalaki nga kuno anak og engkanto nga anaa magpuyo sa maong lugar. Taud-taud na nga katuigan nga wala sila’y tilimad-on nga naalinggatan sa maong lugar.

Apan pipila ka buwan ang milabay, dunay mga drayber og habal-habal nga gikan sa silingang barangay sa Tacup ug Bosogon nga naghinugilon nga makapila ka higayon sila nga gisakyan og gwapa kaayo nga babaye nga anha manaug diha sa mingaw nga dapit.

Si Nilo nga usa ka drayber og habal-habal nga taga Bosogon mikaratil og dagan palayo sa maong lugar ug gibiyaan na lang gani ang iyang motor. Misakay kuno ang babaye didto sa Barangay Kinawahan atul nga dunay kalingawan ug nagpahatud sa Lambusan.

Ang bilyako nga si Nilo midiga dayon nga naibog siya sa babaye. Giawhag si Nilo sa babaye nga ubanan siya sa ilang balay kay ngitngit na. Apan naglibog si Nilo kay gipahunong man siya sa babaye pag-abut niadtong kasagbotan duol sa pangpang.

“Naa diha ang amo,” saysay ni Nilo nga nagsugid sa iyang kasinatian. Apan nahibulong si Nilo kay misuot man ang babaye sa daghang mga sagbot. Nagduda gani si Nilo nga lain og tuyo kaniya ang babaye mao nga iya lang gisunod.

Apan gikuyawan si Nilo kay kalit lang misinggit ang babaye. “Ma, ablihi ko ma! Dia na ko!” Dili balay ang giatubang sa babaye kun dili ang dakung kahoy nga nag-umbaw sa dagat. (Sumpayan)