Mahadlok malain

Dear Tita Salie,

Good day, just call me Jenny, 22 years of age, single ug dunay trabaho.

Magpatabang lang unta ko nimo, Tita, sa pagsulbad niining nakahasol kanako karon nga mao ang akong lovelife.

Duna koy boyfriend manghod pa nako. Apan bisan pa man niini seryoso na kami sa among relasyon. Alang kanako kasal na lang gyud ang kulang magtiayon na ming duha.

Siya ang akong first love, Tita Salie, ug tungod sa akong dakong gugma kaniya ako na nga nahatag ang tanan ngadto kaniya.

Nagkalagyo mi, Tita, tungod kay nag-eskwela pa lang siya sa college samtang ako may trabaho. Busa wala na gyud nako masundi ang iyang kinabuhi. Ug mao na lay akong nahibaw-an gikan sa iyang amigo nga duna na siya’y laing uyab didto sa ilang tunghaan.

Sakit kaayo alang nako ang iyang gibuhat. Tungod kay wala ko magdahom nga kaya ba diay ko niyang pasakitan ug ilisan. Nag-expect nako nga kami gyud ang magkadayon. Apan diay ang tanan mora og usa lamang ka damgo nga sa akong pagmata nahanaw ang tanan.

Ako na lang kaha siyang bulagan, Tita? Pero nahadlok usab ako nga malain unya ngari nako ang iyang mga ginikanan tungod kay suod na kaayo mi. Unsa may akong buhaton? Palihog Pasabta ko. Thank you.

* * *

Dear Jenny,

Ang gugma nga imong gibati ngadto sa imong boyfriend kutob ra gyud ngadto kaniya. Tungod kay ang imong relasyon ngadto sa ginikanan sa imong boyfriend lahi usab ug wala’y kalabotan sa imong na-feel karon ngadto sa imong boyfriend nga karon nagluib kanimo. Mosugot na lang ba diay ka nga mag-antos sa kasakit sa gibuhat sa imong uyab tungod kay suod kana sa iyang parents?

Jenny, ayaw paantosa ang imong kaugalingon tungod lamang sa kaikog. Tungod kay puwede nimong putlon ang imong pagbati ngadto sa imong maluibon nga hinigugma samtang ipadayon ang inyong maayong tinagdanay sa iyang mga ginikanan. Ug ayaw kahadlok nga bulagan ang imong boyfriend tungod kay dili ikaw ang nakasala kun dili ang ilang anak. Kun dunay tawo nga ilang kahiubsan o kasuk-an wala’y lain kun dili ang ilang anak.

Tinuod nga dili sayon buhaton ang pagpakigbulag sa tawong atong gihigugma. Apan tan-awa usab ang iyang gibuhat kun angay ba siya sa imong gugma ug pagmahal. Tingali unya kun pulos na lang konsumisyon ang imong bation nianang imong boyfriend kun karon pa lang dili ka mohimo og hukom. -- Tita Salie