Gula 7
Nabalaka si Albert sa umaabot nga paglangyaw ni Josheba sa Canada. Ug ang gibati niyang kabalaka kadali rang nahino’g ngadto sa kahadlok. Kahadlok nga nagdulot og insecurity sa iyang kaugalingon.
Apan wala na niya ikapadayag ang iyang gibati ngadto kang Josheba. Sa iyang hunahuna, wala nay kapuslanan kun iya kining itug-an ngadto sa iyang hinigugma. Dili na kapugngan ang pag-adto ni Josheba sa Canada. Labot pa, nakasanong na usab siya sa pag-adto ni Josheba sa Canada. Labot pa, nakasanong na usab siya sa pagtugot niini bisan ang tinuod dakong supak kini sa iyang kabubut-on. (Miuyon na lang siya sa kahadlok nga mahiubos si Josheba kaniya o magkalalis ba hinuon sila. Gawas pa, wala pa siya’y hingpit nga katungod pagpugong sa dalaga.)
Unsaon na lang kun makakita si Josheba og laing lalaki nga mas labaw pa kaniya didto sa Canada. Mao kini ang lintunganay sa iyang kahadlok ug kabalaka. Insecured kaayo siya. Daw hulga kini nga nanagingting sa iyang kaisipan. Posible man gud nga mahitabo kini. Maanyag si Josheba. Nakahupot kini sa mga hiyas nga dali rang makadani sa mga kaliwat ni Adan. Tulo ka tuig nga magpuyo si Josheba sa Canada. Tulo ka tuig usab nga mahimutang sa ngilit sa bung-aw ang ilang gugma.
Hinuon, may pagsalig siya sa kaligdong ug kalig-on sa baroganan ni Josheba mahitungod sa ilang gugma. Apan niining higayona, dili kini igong katarongan aron mahupay ang gibati niyang kabalaka. -- Sumpayan pa