Si Kumare

Gula 5

Human madungog ni Lorena ang pasalig kaniya ni Abner, miparayeg siya dayon ngadto sa iyang kumpare nga nahimo na niya nga boyfriend.

Nagginaksanay sila si Abner ug Lorena. “Bebs I love you,” matud ni Abner nga nagbutok-butok ang dughan sa kalipay. “Mahal ‘sab tika kaayo Abner,” dali nga tubag ni Lorena.

Naglami pag-ayo ang ilang pagparayganay sulod sa lawak nga giestahan ni Lorena sa balay sa iyang amiga. “Bebs, gusto ko nga lipayon ka sa tibuok mo nga kinabuhi uban kanako,” ni Abner.

Ang maong pasalig ni Abner nga gisubli-subli niya paglitok atubangan ni Lorena maoy nakapainit pag-ayo sa kaparaygon sa dalaga sa iyang boyfriend.

Wala kapugngi ni Abner ang iyang mga kamot nga mihapuhap sa kalawasan sa dalaga.

Sa daklit nahanduraw ni Abner ang una nila nga panagkita ni Lorena didto sa simbahan atul nga nagpabunyag ang dalaga sa iyang anak ug sa kanhi niya boyfriend.

Gitagay nilang duha ang katam-is sa gugma sulod sa gamay’ng lawak nga giestahan sa dalaga. Nag-abut ang ilang ginhawa nga daw gitungas nila ang habog kaayong bungtod.

Grabe kalalim ang kalipay nga gibati nila ni Lorena ug Abner. Dihang inanay na nga nahanaw ang ilang kakutas, gihagkan pag-usab ni Abner si Lorena.

“Nabalaka ko nga karon nga imo na ako nga naangkon Abner, imo na lang ko nga talikdan,” hinay ang tingog ni Lorena nga naghapyud-hapyod sa nawong ni Abner.

Gipasaligan pag-usab ni Abner si Lorena nga dili niya kini talikdan. “Gusto gani ko nga magpakasal unya ta Bebs,” matud ni Abner. Ang gihimong pasalig ni Abner nakahatag og kadasig ni Lorena.

Giswerte sila kay pwerte ang pagkahinanok sa bata ni Lorena mao nga nakalugar sila pag-ayo. Subli nila nga gihimo ang pagparayganay ug ang pagtagay sa kalipay.

“Malipayon kaayo ko uban kanimo mare Bebs,” hagawhaw ni Abner kang Lorena. Miagik-ik sa pagkatawa si Lorena nga nakadungog nga gitawag siya’g mare ni Abner.

Human sa ikaduhang hugna sa ilang paglipay-lipay, nag-iya-iya sila pagsul-ob sa ilang mga sapot. Diha pa nila mamatikdi nga tunga’ng gabii na diay.

“Mopauli na ko Bebs. Magkita na ‘sab ta ugma,” pananghid ni Abner sa iyang kumare nga nahimong girlfriend human niya patiki og init nga hawok. (Sumpayan)