Colawin, Argao, Cebu

Ato na lang kining ipakuha sa taga punerarya ang lawas sa imong pasyente mam.” Sa doktor nga nanangtang sa dekstros ug oxygen sa lawas ni Linda.

“Apan dok, buhi pa kining akong inahan,” sa anak nga si Nita. “Imo kong kuhaan og kabuot madam nga napulo ka tuig ko kining gi-eskwelahan ang akong kurso sa pagka-doktor!” diay pagtaas sa tingog sa doktor.

“Ako ang tagtungod busa ako ang masunod, buhi pa kining akong mama Linda ug dili ako motugot nga balsamaron siya,” madasigong pulong sa anak.

Na-admit sa ospital si Linda human atakeha sa kasingkasing. Apan pipila ka adlaw sa tambalanan mideklarar ang doktor kaniya nga patay human ilang nasuta nga bugnaw na ang lawas ug wala na kini gininhawa ug pitik sa iyang pulso.

Apan wala nawagtangi sa paglaum si Nita. Padayon niyang gialimahan ug gimasahe-masahe ang kalawasan sa pinangga niyang inahan. Bisan bugnaw ang kalawasan apan nasuta ni Nita nga aduna pay kainit sa ilawom niini ug wala pa usab kini mogahi.

“Unsa na mam, buhi na imong pasyente?” sa mga doktor nga adunay tuno sa pagbugalbugal.

Igo lamang miduko si Nita samtang padayong nagmasahe.

Sa laing bahin nanglimbasog ang inahan ni Linda sa pagpangupot sa mga gamot sa kahoy ug sagbot aron dili siya mahulog ngadto sa naglawod nga kalayo. Kinahanglan niyang maghinay ug mag-amping tungod sa kasalikwaot sa dalan nga iyang gisubay. Gamay lamang sipyat mahimong matusok usab siya sa mga tunok nga anaa sa iyang isig kakilid.

Hangtod nga miabot siya sa labing ibabaw nga bahin. Ug didto iyang nasuta ang matahom kaayong palibot ug aduna usab kini nindot kaayong kural. Iyang nakita gikan sa gawas ang bagang panon sa mga tawong masadya, adunay nagsayaw-sayaw, nagkanta, nagtugtog ug nagtorotot. Ingon sa wala’y kataposan ang kalipay kung anaa ka didto.

Apan may misugat kaniya pag-abot tungod sa maong koral. Nagkugos kini sa batang karnero ug nagsungkod. Tag-as ang mga buhok ingon man usab ang iyang bangas ug adunay kasarangan nga pangidaron, sa iyang pagtuo mao na kini si Jesukristo. Mipahiyom kini kaniya ug nagkanayon. “Dili ka pa angay dinhing dapita ug pauli lang usa,” pong sa gituohang Ginoo dihang buot  unta niyang mosulod.

Niadtong tungora mibuka dayon ang iyang mga mata. Gibati ni Linda ang tumang kauhaw ug kagutom ug nabasa usab sa singot ang iyang gisuot. Saktong ikatulo ka adlaw karon sukad siya gideklarar nga patay sa mga doktor.

“Diin man diay ka gikan manang nga ingon sa perte man nimong bulosa’g panagway?” sa nakisayod nga doktor ngadto kang Linda.

“Taas nga sugilanon,” mapahiyumong tubag ni Linda ngadto kanila. (Kataposan)