Langgam sa Kagabhion - Gula 49

Gikolekta nakong daan ang bayad sa wala pa sila mosulod sa motel. Sineguro ang akong paagi kay aduna ra bay sipat nga mga lalaki nga dili mobayad ug mosibat kun makagamit na sa babaye.

Debuynas gayod ako niadtong gabhiona. Ang tanang burikat nga akong gipang-deal pulos nangahalin. Lakip ako nakakuha usab og kustomer.

Kuntento na ko sa akong kinabuhi ug malipayon ko tungod kay dili na man mahutdan og kuwarta ang akong pitaka. Bisan kun medyo tagsa na lang akong kustomer ug barato pa gyud kaayo, apan wala ko biya-i sa mga babaye nga gustong magpa-deal kanako.

Usa ka adlaw niana, nahibalik sa among dapit ang duha ko ka mga anak sila si Princess ug Ana. Minyo na diay ang duha ko ka mga anak. Pulos sila nanagdala og bana sa ilang pagpauli. Apan nahisagmuyo sila sa pagkasayod nga bisan mihunong na ako sa pagpamurikat, nagbugaw man ako sa batan-on nga mga burikat.

Ang bana ni Princess usa ka construction worker. Samtang ang kang Ana engineer. Medyo nahimutang na sila sa ilang tagsatagsa ka pamilya. Gani may kaugalingon na silang balay. Mas gisuwerte si Ana kay kuwartahan ang iyang nabana kay maayo man og trabaho.

Milarga ang bana ni Ana paingon sa gawas kay nakakuha man kini og trabaho didto sa laing nasod. Gibilin lang niini si Ana dinhi sa Pilipinas. Maoy ilang sinabotan nga mobakasyon kini dinhi sa Pilipinas ka usa sa usa ka tuig. -- Sumpayan pa