Kaspa

Dear Tita Salie,

Good day to you, Tita. Tawga lang ko og Ms. Blue girl, 18 years old, from San Fernando, Cebu. Ganahan kaayo ko mobasa og Banat News, labina ang imong column ang pasabta. Mao nga naaghat pod ko og sulat niining akong suliran kay basin kun imo kong matabangan.

Ang akong problema dili kini kabahin sa gugma. Wala pa ko mag-apil-apil niana tungod kay maulaw man ko tungod sa akong kahimtang. Maoy akong gusto nga masulbad una kining akong problema aron confident na unya ko sa akong kaugalingon.

Nagproblema gyod ko sa akong ulo, Tita Salie, tungod kay napuno kini sa kaspa. Perti gyod kakatol basta motukar na siya. Dili gyod ko mahimutang kay magsige na man lang ko og pangutkot. Ako nang nasulayan halos ang tanang  anti dandruff nga shampoo apan walay epekto. Unsa may akong buhaton niini, Tita? Basin kun duna kay nahibaw-an nga imong ika-recomend nako kay akong sulayan pag-apply. Mamasin lang ko nga masulbad ang akong problema.

Daghang salamat sa imong pagtagad. Maghulat gyod ko nga imong matubag ang akong problema. More power and God bless you always. -- Blue girl

* * *

Dear Ms. Blue girl,

Mas maayo gyod intawon kun imong pangitaan og paagi kun unsaon aron mahurot ang kaspa sa imong ulo tungod kay dili ka na bata, dalaga ka na. Ug dili gyod maayo tan-awon sa usa ka dalaga nga magsige og kutkot sa iyang ulo. Unsaon na lang kun adunay manguyab kanimo ug mamisita nimo ug samtang nakig-estorya ka sa imong suitor nagsige ka og kutkot sa imong ulo. Tingali unya kun ma-turn off sila kanimo ug likayan ka pa sa kahadlok nga matakdan sila.

Nasulayan na ba nimo og gamit ang “nizoral”? Ang nailhan na nga epektibo kaayo pangontra sa kaspa. Hinuon, medyo mahal-mahal kini apan imong makita gyod ang epekto. Gamita kini 2x or 3x a week ug nakasiguro ko nga duna gyo’y kausaban sa imong pamati.

Nasayod ta nga makuhaan gyod ang atong confidence kun kita nasayod nga aduna kita niini. Puyde usab nimong sulayan ang tono sa lubi imong ibutang sa imong bagolbagol ug nimong kutkoton. And of course likayan nimo ang pagsige og bulad sa init. Likayan imo nga ma-expose ang imong ulo sa init. -- Tita Salie