Dear Tita Salie,
Have a nice day. Tagoa lang ko sa ngalan nga AC, 20 years old. Minyo na ko ug dunay 1 ka buok anak. Ang akong problema mahitungod kini sa akong relasyon karon sa laing tawo.
Yes, minyo na ko, Tita, apan wala nako kapugngi nga akong gikarelasyon ang among silingan. Duol ra gyod kaayo ang among gipuy-an ug usa ka higayon nga dunay okasyon sa among silingan nagka-jam mi ug nag-inom. Tungod sa among giinom nga medyo nadaghanan nahubog gyod mi. Ug kining usa nako ka silingan nisulti nako nga duna siya’y gusto diri nako. Naibog kuno siya nako. Apan wala lang nako panumblinga ang iyang gisulti tungod kay hubog lagi.
Apan paglabay sa pipila ka semana kalit lang nausab ang akong pagbati kaniya. Ganahan na pud ko nga permi siyang ikauban. Busa nagsige na mi og kuyog manuroy, Tita. Kanunay lang mi nga mangita og paagi aron makalakaw. Ug sa pagsige namo og kuyogkuyog, Tita, nakasulod gyod mi og pribadong lawak. Duna nay nahitabo kanamo ug amo na kining gisublisubli ang lawasnong kalipay.
Apan luyo sa akong paglingawlingaw anaa ang kahadlok nga tingali kun masakpan mi sa among binuang nga pareha ra ba mi nga minyo. Unsa may akong buhaton, Tita? Palihog pasabta ko. Thank you so much and more power.
* * *
Hello!
Bisan kun wala ka nagpaila sa imong kaugalingon apan akong nasabtan nga usa ka babaye ug usa ka asawa.
Akong masabtan nga usa ka ka asawa apan mahilig sa unwind o lingawlingaw. Natural lamang kini nga mangita gyod kita og kahigayonan nga maka-relax gikan sa trabaho matag-adlaw sa opisina, o bisan trabaho sa panimalay. Nagkinahanglan gyod nga makapahulay ang atong hunahuna aron dili kita dali maluya. Kay ang tawo nga stressed sa trabaho kasagaran masakit o kaha mahimong saputon.
Apan kinahanglan gyod nga mag-amping usab kita sa lingawlingaw nga atong gibuhat kay usahay mao kini ang magtulak kanato sa kaalaotan. Nausab ang imong pagbati ngadto sa imong silingan nga usa usab ka minyo tungod kay imo man kining gihatagan og pagtagad. Dapat wala nimo hunahunaa ang iyang gisulti tungod kay minyo na ka ug nasayod ka usab nga minyo na ang maong lalaki. Wala unta ka nagpadala sa iyang kaboang kay nasayod ko nga wala siya mahigugma kanimo. Ang tanan pulos kaboang lang apan imong gitubayan.
Kun gusto ka nga malinawon ang imong kinabuhi ug ang imong pamilya undang sa pagkuyogkuyog nianang lalaki nga labaw sad nga minyo. Maoy atubanga ang imong anak ug ang imong bana. -- Tita Salie