Naungo sa kuwarta

Nag-usab-usab ang bulok sa nawong ni Doning Goc-ong samtang nagbasa og suwat atubangan ni Atty. Ritchie Tibon, nga naglingkod sulod sa bupete sa abogado ning sayong kahaponon. Manglipaghong. Mangluspad. Mikunot ang agtang. Usahay moping-it. Nahigala ni Doning ang abogado kay nasuki niya sa iyang taksi. Duha ka semana na ang nakalabay sukad nagpahimo si Doning og demand letter ug si Ritchie ang gipapirma. Gipaanhi sa abogado si Doning aron makabasa sa tubag.

“Dear Atty. Tibon, Salamat sa imong pagsuwat aron pinaagi sa akong tubag mailhan nimo ang pagkatawo ining imong kliyente. Wa koy obligasyon sa pagbayad niya. Gani, siya pa ang utangan nako kun magkuwentahay mi. Pag-abot nako sa among lungsod sa Huanoco gikan sa Amerika, kulang nalang siya moluhod aron lang maoy pahimoon sa desinyo sa balay akong ipatukod. Siya sab ang nangontrata’g mga panday. Wala siya maghisgot og bayad sa iyang serbisyo kay igsoon. Wa sab ko magdahum nga pabayad siya. Kay may pag-umangkon ko nga Architect ug may kasosyo nga Interior Designer. Nasabot na nako sila. Dili magpabayad kay nag-ila nako nga iyaan. Si Doning akong gipili, kay abi nako’g mobati nako isip igsoon.

Kun mokiha siya, dili mi moatras sa kaso. Kay siya ang sad-an. Wa mi sala niya. Ining gikabangian nga pagtukod sa among balay, amo siyang gitaktak sa trabaho. Kay nabisto iyang dakong overprice sa materyales ug suholan sa mga panday. Naningil siya’g suweldo sa mga panday nga tag-P600 matag adlaw. Kay niya pa, eksperto sila. Unsa bay naka-eksperto? nga sa duha ka semanang trabaho sa kisame sa among lawak, nagsiba’g man. Way nagsigo sa mga trabaho sa kisame. Nagliyad ug nagkang-al ang mga dapat. Puwerteng lagota sa akong bana nga si Martin. Amerikano nga may construction firm sa Nashville. Way kabangkaagan iyang mga panday. Ug may ebidensiya mi nga P300 iyang “cut” sa suholan sa mga panday. Grabeng tulis sa atubang. Busa, nangita mi’g tarong nga mga panday nga kamao gyud sa trabaho.

Sa didto pa ko’s Nashville, mata’g karon ug unya, motawag si Doning kay mangutang. Nangutang siya’g ipalit og kotse kay himoong taksi. Gihatagag kuwarta. Kada lihok niya kuwarta. Ako ang naghatag niya’g kuwarta para franchise, repair ug maintenance sa taksi. Ang kita iya tanan. Pero ang gastohan ako. Way nauli nako bisan peso. Nagpapalit siya’g motorsiklo, gipalitan. Nagminyo. Gigastohan sa kasal. Engrande. Gipatukuran siya’g balay sa ako mismong luna. Nagnegosyo siya’g food supplement, gihataga’g puhonan. Unya unayon pa ko’g baligya, way discount. Grabeng paginansiya. Sa laktod pagkasulti, lamyon niya’g apil akong bukton.

Tinood, gradwado siya’g Computer Engineering. Apan wa siya’y lisensiya o permiso sa pagpangontrata og construction. Wa siya’y nakamahuan sa pamanday. Dili niya ubson iyang pagtan-aw sa grade five lang nga panday nga sukad sa pagkabata nagtubo na sa pagpamanday. Giila ko siyang igsoon. Gikalooy nako kay kinamanghuran. Apan sa iyang gibuhat, wa siya mag-ilang igsoon ko niya. Wa siya mag-ila’g utang kabubut-on. May manghod kong si Roger, usa ka CPA nga naospital (tulo ra mi ka magsoon). Usa ka adlaw sa di pa mogawas sa ospital, nagteks na daan niya nga pakuha sa ospital anang orasa inig ka ugma. Nagpalingog-lingog lang siya kay mahadlok og di moplete iyang maguwang. Wa siya maghunahuna nga sa kada papirma niya’g papeles sa CPA, wa siya pabayara. Suwapang sa nga tanan nga way sama ka salbahis tawhana.

Kun magpabayad siya og P300,000 mobayad mi. Apan pabayron sab nako siya’s iyang mga utang nako. Kun naungo siya sa kuwarta, dili unta siya mangunay og igsoon. Adto unta siya mamalbal sa laing tawo. Andam na mi motubag sa kaso iyang ipasaka batok namo. Kay ikiha sab siya namo og ESTAFA ug EJECTMENT. Hinaut mapasabot nimo sa imong kliyente ang among baruganan. Kanimo matinahuron, (Pinirmahan) Maychel Goc-ong Jones”.

“Ako una ning paserokan, attorney” ni Doning, dayong tindog og lakang pagawas sa bupete. Gisundan og tan-aw ni Ritche ang kliyente. Nakahukom siya nga pabayad og dakong acceptance fee. Kay subidahon ang kaso ni Doning. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)