Nasunogan sa Mandaue nahatagan og ayuda ni Sen. Go

CEBU, Philippines —  Nakadawat og ayuda ang mga biktima sa sunog sa Dakbayan sa Mandaue gikan ni Senador Christopher Lawrence “Bong” Go, niadtong Biyernes.

Duha ka barangay sa Dakbayan sa Mandaue nga mao ang Jagobiao ug Alang-alang ang nakadawat og hinabang pinaagi sa relief operations human sila nasunogan niadtong Hunyo 18 ug 28 sa nilabay nga buwan.

Ang barangay Jagobiao adunay 44 ka pamilya o 122 ka individual ang nawagtangan ug panimalay gumikan sa sunog niadtong Hunyo 18, 2023.

Samtang 81 ka pamilya o 188 ka indibidwal usab nahatagan og hinabang sa Barangay Alang-alang nga nasunogan usab niadtong Hunyo 28, 2023.

Lakip sa gipanghatag sa senador mao ang mga food packs, snack, vitamins, face mask ug uban pa.

Gihimo usab ang pa raffle ni senador Go sa mga sapatos, cellphone, relo ug bisikleta.

Ang senador nipadayag nga walay laing magtinabangay kita ra gihapong mga pilipino ug tungod kay bisaya man usab siya hinungdan dako kaayo ug luna sa iyang dughan ang mga Sugbuanon.

Ang pagpaambit ni Go gikalipay usab sa mga benipisyaryo niini diin ilang nahinabi ang senador pinaagi sa live video call.

Pinaagi sa initiative ni senador Go aduna usab financial assistance nga nadawat ang mga biktima sa sunog pinaagi sa programa nga Assistance to Individuals in Crisis Situation kon AICS sa DSWD.

Ang buhatan usab ni Mandaue City Lone District Representative Congresswoman Emmarie “Lollypop” Ouano-Dizon mihatag usab ug hinabang ngadto sa mga nabiktima sa sunog sa nahisgutang siyudad. (BANAT NEWS)