No objection

Nakit-an man tikang nag-hike! Taga-Guadalupe diay ka?” ni Judge Virgie Endab ngadto ni Atty. Mario Antowa. Nagtsikatsika na ang duha ka managhigala nga klasmet kaniadto sa law school kawhaan ka tuig na ang nakalabay.

Katapusang gibista karong buntaga ang kaso nga gigunitan ni Mario nga damages diin abogado siya sa gikiha. Usa ra iyang kaso nga nia sa sala ni Judge Endab. Alas onse i medya pa ron sa buntag. Sila na lang duha nahibilin sa husgado.

“Nag-abang ko’g balay sa Guadalupe, Judge. Pero Sibonga gyud akong residensiya” ni Mario. “Tagpila ka oras imong hike?” sa huwes nga naglingkod lang gihapon sa mala trono nga lingkuranan. Unya si Mario naglingkod sa witness chair. “Duha. Lahos sa Ayala dayon balik. Alas singko sa buntag akong igawas” ni Mario. “Ako, sa balay na lang. Nag-treadmill na lang ko. Kay mahadlok ko’s karsada” sa huwes. “Angay lang judge. Kay risgo kaayo nimo” ni Mario.

“Maminaw ka lang og music kon mag-hike?” sa huwes. “Ako’y magkanta, judge. Magmemorya ko’g usa ka kanta kada buntag” ni Mario. “Nindot diay ka’g tingog?” sa huwes.”Depende lang sa maminaw, judge. Ambisyon gyud unta nako nga mag-singer. Apan dihang nanamin kong nagkanta, wa ko kauyon sa akong nakita” ni Mario. Nipahiyom ang huwes.

“Nalipay na lang sab ko nga naabogado ko. Kay kaniadto sa wa pa ko naabogado, wa gyuy mohagad nako’g pakanta. Karon, kun dunay pundokpundok labi na’g gipasiugdahan sa kliyente, moingon dayon sila, pakantahon nato si attorney. Moingon sab ko, masuko man gani ko’g di pakantahon” ni Mario. Nakatawa ang huwes. “Giingnan ko lang sila, don’t look at the face. Just listen to the voice” ni Mario. Nibahakhak og katawa ang huwes. “Unya moingon sila, nasayop diay imong propesyon attorney. Dapat singer unta ka. Tubagon ko lang  nga, ang singer kinahanglang guwapo gyud” ni Mario Nahilom ang huwes.

“Kon dunay partyparty sa husgado, pakantahon unya tika” sa huwes. “No objection Your Honor. Sa gikaingon ko na, masuko man gani ko’g di pakantahon” ni Mario. “Na hala, adjourn na ta. Basi’g gigutom ka na, Mar” sa huwes. “Wa pa, judge. Pero basi’g ikaw. Imbitahon unta tika’g paniudto.

Pero, basi’g ma bombo radio ta” ni Mario. “Bitaw. Dili gyud puwede makig-socialize ang abogado sa huwes kansang sala may kaso ang abogado. Por delikadiza” sa huwes.

“See you next time” ni Mario. “See you” sa huwes. Naglamano sila una nibiya si Mario. (Kataposan)