Sa balak ra malitok

Sa dinner date nila sa Valentine’s Day, gipahungaw ni Clara iyang kalagot batok sa hinigugma. “Nganong di ka man kapili og regalo para nako? Unya sa imong maestra nga seksi, niregalo ka’g  jewelry box?!” ni Clara  ngadtong Bart nga nagbasa sa menu atubangan niya sa lamesa. Masuk-anon ang tuno ni Clara sa iyang mga pangutana. Hait og tinan-awan sa hinigugma.

“Nasayod bitaw ka nga wa gyud koy talent sa pagpili og regalo. Sa mga important dates nato sama sa birthday nimo, Pasko ug Valentine’s Day, cash ra gyu’y akong mahatag. Kay nagtigum man sab ko alang anang mga okasyona. Aron segurado ko nga ang imong mapalit sa cash, ang imo gyung gusto” ni Bart sa malumong tingog. Niyahat og tan-aw sa kaatubang sa lamesa.

“Maayo man lagi kang nipili sa jewelry box alang sa imong maestra? Akong mga higala nga klasmet nimo, ni-teks nako nga may crush kuno nimo imong maestra. Gipa-kiss pa kuno ka sa cheek human gidawat imong regalo” ni Clara. Nagmug-ot kay nagselos. Nakapanghupaw ang ulitawo.

Nagtungha sila sa kursong Accountancy. Night classes. Si Bart usa ka self-supporting student. Nagtrabaho isip clerk/encoder sa usa ka accounting Firm sa dakbayan. Si Clara, full time student. Klasmet sab sila ni Bart sa ubang mga subjects. Fourty year na sila sa kolehiyo. Tulo ka tuig na nga uyab.

“Ayaw na lang god og laina pagsabot. May giapas ko’s akong maestra. Dakong grado. Maong nagpa-impress ko niya. Dihang gisugo ko’s akong amo nga may ipa-follow up sa Kapitolyo, may nasugatan kong priso nga namaligya og jewelry box nga gama sa native materials. Naluoy ko sa priso. Busa, akong gipalit iyang baligya” ni Bart. Nitutok sa hinigugma. Unya nisenyas og waiter kay nakapili na’g unsay orderon.

“Grado ra gyud kaha imong giapas sa dagang maestra? Wa nay lain?” ni Clara. Seryoso ang nawong.

“O, oy!” ni Bart.

“Segurado ka?” ni Clara.

“Sure na sure. Ang akong giapas nimo, imong gugma ug pagpangga. Wa nay luna sa laing binuhat ang akong dughan” ni Bart. Seryosong nagtutok sa hinigugma ug nagtapion sa iyang dughan ginamit ang tuong palad. Ang walang kamot gigunit sa tuong kamot sa dalaga.

“Ah! Balak man” ni Clara. Nipahiyom.

“Sa balak ra gyud malitok ang tinood nga gugma” ni Bart. Dayong tindog ug duol ni Clara. Gihagkan niya ang hinigugma. Lips to lips. Dugay. Wa nila baleha ang daghang tawo sa palibot. Napakgang sila dihang niabot ang waiter nga naghatud sa ilang gi-order. (Kataposan)