Dumanjug kampiyon sa Cabaron Cup

CEBU, Philippines — Ang Dumanjug nagsandig sa managsoong Joseph Arth ug Joseph Airo Nalos Jr. aron pakagingon ang Dalaguete, 78-64, ug langkaton ang kampiyonato sa Mayor Inocentes Cabaron Invitational Inter-Town Basketball Tournament 2024 didto sa Moalboal Plaza naidtong Dominggo sa gabii, Mayo 12.

Si Joseph Arth mikadlit og 23 puntos, samtang si Joseph Airo midugang og 14 puntos alang sa Dumanjug nga gawas misakmit sa titulo mibulsa sab og P200,000 nga ganting salapi.

Ang Dumanjug alkansi og dos puntos human sa nag-unang 10 minutos sa aksiyon, apan si Joseph Airo mitagak og 12 puntos sa ikaduhang kuwarter diin ilang gilabhan ang Dalaguete, 27-11, aron kontrolohan ang duwa sa hingpit uban ang 43-29 nga labaw sa halftime.

"It was a very good game. Dalaguete is also a good team and they played very well bu our players did their job," matud pa ni Christopher Eugenio Co, nga sakop sa Dumanjug coaching staff.

"We're very thankful to Mayor Inocentes Cabaron for inviting us to the tournament. It was a good exposure for our players and it also promoted camaraderie among the teams," dugang pa ni Co.

Human nangitlog sa first half, si Joseph Arth nagmangtas aron pagpabuto og 23 puntos sa pinal nga duwa ka kuwarter. Mitali siya og 16 sa 18 puntos sa Dumanjug sa ikatulong kuwarter nga nakapakgang sa tinguha sa Dalaguete nga makabangon.

Si Mark Delgado misuway og salbar sa Dalaguete apan ang Dumanjug dunay tubag sa matag ataki sa ilang kaatbang dayon na ngadto sa paglabi sa korona. Si Sommy Managor mihipos og 14 puntos alang sa Dalaguete, nga malipayon gihapon taliwala sa kapildihan kay nakadawat og P150,000 nga premyo sa pagpahiluna nila sa ikaduhang dapit.   

Sa sangka alang sa ikatulong puwesto, si Shooster Olago mipaulbo og 29 puntos sa dihang gibugha sa Barili ang Aloguinsan, 91-76, aron pagkubra og P100,000.