Ambot nahibawo ba

Gitigum ni Cebu City Mayor Nestor Archival ang mga private water suppliers sa Metro Cebu Water District (MCWD) ug gihisgotan nila unsaon pagpangandam ang pagnihit sa tubig tungod sa El Niño.

Nindot baya ang gihimo sa mayor, apan ambot og nasayod ba kaha siya sa ubang isyu kabahin sa tubig. Ang gipasabot nako nga ang kanihit og tubig sa ubang dapit dinhi sa dakbayan, maiban-ibanan ra baya unta kon wa pa ibani sa MCWD ang gipalit nilang tubig gikan sa ilang mga supplier.

Si Mayor Archival mitutok sa mga dukomento nga gipakita kaniya, apan sigurado ko nga kining akong gipasabot wa maapil sa gitan-aw nga dukomento sa mayor.

Dili ikalimod nga daghang dapit dinhi sa siyudad, problemado kaayo og tubig. Sa Barangay Lorega-San Miguel, dunay mga sitio nga kadlawon ra moagas ang tubig kon ang ubang mga tawo nangatulog pa. Apan inigmata sa nangatulog ug mogamit na og tubig, pawong na ang ilang gripo.

Ngano man ni? Ang tubag kay kuwang og suplay nga tubig ang MCWD. Unsaon, duna untay daghang tubig ang ubang supplier, giibanan man sa MCWD ang ilang gikuha.

Pananglit, ang JE Hydro nga supplier og tubig sa MCWD gikan sa Barangay Lusaran, Cebu City, kaniadto nagsuplay ni og 30,000 cubic meters nga tubig (150,000 ka baril) kada adlaw, karon 20,000 cubic meters ra man ang gikuha sa MCWD.

Ingon usab niini ang gihimo sa MCWD sa ubang private suppliers nila nga giibanan ang gidaghanon sa tubig nga ilang gikuha, ug miresulta kini nga nagnihit na ang tubig nga mahatag nila sa mga water consumers.

Unya, kini si Mayor Archival taga Talamban man ni, usa sa mga barangay sa upland areas. Ambot og nasayod ba siya nga dunay kompaniya nga gustong moserbisyo sa katawhan sa bukid, pagsuplay kanila og tubig, apan gibabagan sa MCWD.

Tambag nako ninyong mga lumolupyo sa bukirang barangay sa Cebu City nga wa maabot pagserbisyo og tubig sa MCWD, paghugpong mo ug pagsuwat mo sa mayor nga matabangan mo nga makatubig.

Ang argumento sa MCWD nga gibabagan nila nga maka-operate ang usa ka kompaniya pagsuplay og tubig sa kabukiran, kay anha ra usab kuno kini magkuha og tubig sa pundohanan sa JE Hydro.

Gi-interview man nako niini ang taga JE Hydro, ug wa man sa inyong kontrata nga ang ilang tubig “exclusive” nga anha ra gyud isuplay ninyo. Masabot na man hinoon nga mora’g dili gyud gusto ang MCWD nga ang taga bukid maharuhay nga moabot sa ilang panimalay ang tubig.

Unya ikaw Mayor Archival, wa ka ba malooy sa mga tawo nga way koneksyon sa MCWD, ug gustong makatubig, apan gibabagan sa MCWD nga sila makatubig unta?