Tinun-an napalgang patay

CEBU, Philippines — Usa ka 24-anyos nga tinun-an ang napalgan nga patay ug dunay samad pinusilan sulod sa pampublikong sam-ang sa Proper, Barangay Adlaon, siyudad sa Sugbo kagahapon sa kaadlawon.

Ang biktima mao si Cliesthenes Arcilla Gabud, 24 anyos ug nagpuyo sa Sitio Camadricacawan, Barangay Adlaon ning siyudad. Sa impormasyon sa kapulisan sa Police Community Precinct sa Barangay Adlaon dunay nakakita og abandonadong motorsiklo sa daplin sa dalan sa naasoy nga dapit.

Pag-abot sa kapulisan sa lugar nabantayan nila nga ang motorsiklo ug sa yuta nga adunay mga lama ug patak sa dugo paingon sa sam-ang duol sa lugar. Ilaha kining gisubay ug didto nakit-an ang patay'ng lawas sa biktima nga dunay samad-pinusilan. Sa paghiling sa SOCO sa motorsiklo sa biktima na-recover nila ang coin purse, national ID sa biktima, cellphone ug naka recover sab sila og duha ka basiyo sa bala sa wala pa matino nga kalibre sa armas.  Dunay impormasyon nga nadawat ang kapulisan bahin sa background sa biktima apan wala una nila gibutyag sanglit ilaha pa kining siguraduhon.

Gituohan sa kapulisan nga giatangan o dunay kasabot ang biktima sa dapit.  IBM BANAT NEWS