PH team para sa AVC Cup pinangalanan na
MANILA, Philippines — Babanderahan nina UAAP stars Angel Canino ng De La Salle University at Casiey Dongallo ng University of the East ang women’s national team na sasabak sa AVC Challenge Cup.
Pormal nang inanunsiyo ng Philippine National Volleyball Federation (PNVF) ang opisyal na listahan kahapon ilang araw bago magsimula ang liga sa Mayo 22 hanggang 29 sa Rizal Memorial Coliseum.
Patuloy pang nagrerekober si Canino matapos magtamo ng injury sa eliminasyon ng UAAP Season 86.
Subalit tiniyak ni Canino na magiging handa ito bago sumapit ang torneo.
“So far, still trying to be 100 percent. I’m trying to recover and go back sa dating ako,” ani Canino.
Masaya si Canino na makapasok ito sa national team tulad ng kaniyang ama na miyembro ng national team sa men’s division noon.
“Yung father ko gusto talaga niya na ma-experience ko yung national team.Kasi very different experience ito kumpara sa paglalaro sa school. Sa national team kasi may pride sa paglalaro para sa Pilipinas,” dagdag ni Canino.
Maliban kina Canino at Dongallo, pasok din sa lineup sina La Salle setter Julia Coronel at middle blocker Thea Gagate gayundin ang ilang PVL standouts kabilang sina Fifi Sharma at Faith Nisperos ng Akari, at sina Dawn Macandili at Vanie Gandler ng Cignal.
Hahataw din sina Sisi Rondina at Cherry Nunag ng Choco Mucho, Eya Laure at Jen Nierva ng Chery Tiggo at si veteran playmaker Jia Morado na naglaro para sa Denso sa Japan V.League.
Nasa Pool A ang Pilipinas kasama ang Chinese-Taipei, India, Iran Australia habang nasa Pool B naman ang Vietnam, Indonesia, Kazakhstan, Singapore at Hong Kong.
- Latest