Siyam ka tawo nga nalambigit sa illegal recruitment sikop sa NBI

CEBU, Philippines — Siyam ka tawo ang nasikop sa mga operatiba sa National Bureau of Investigation human gireklamo sa mga biktima nga gisaaran nga patrabahoon ngadto sa Australia apan giingong ilad diay kini.

Ang mga suspetsado mao sila si Alice Rondez, Cristina Tamayo, Glenard Musngi, Leon Alegado, Eliza Tonacao, Lemuel Ahito, Levert Fuentes, Librada Jumanguin ug Jocelyn Rebasa.

Ang NBI-7 nipahigayon og entrapment operation niadtong nakalabay’ng Domingo diha sa Barangay Pooc, Dakbayan sa Talisay. Ang giingong ilegal nga pagpang-recruit naaktohan nga gitambongan sa ubay-ubay nga mga tawo hinungdan nga nasikop ang siyam ka suspetsado nga nalambigit sa maong ilegal nga kalihokan.

Gidala ang mga suspetsado diha sa buhatan sa NBI-CEVRO ug napasakaan na og kasong illegal recruitment in large scale and syndicated diha sa Talisay City Prosecutor's Office.

Matud ni NBI-7 Director Atty. Renan Augustos Oliva nga tuig 2023 pa nakadawat sila og reklamo sa ilegal nga kalihokan sa mga suspetsado diin mang-agni kini og mga tawo ug pasaligan nga maka-abroad sa Australia ug magtrabaho ngadto isip mag-uuma bugti sa kwarta nga ibayad sa mga tawo nga motambong.

Giingong target nila kadtong adunay mga grupo aron makaengganyo usab sa ubang mga miyembro nga moapil.

Ang mga recruit mandoan usab nga mangkabig og lain aron mauna sa paglarga diin gihulagway ang estilo nga pyramiding scheme.

Nidagsa sa buhatan sa NBI ang uban nga mga biktima gikan sa nagkadaiyang dapit sa Sugbo.

Ang pipil ka mga biktima nipadayag nga tuig 2017 pa nagsugod sa ilang modus ang grupo diin gibana-banang liboan na ka tawo ang nabiktima dili lang sa Sugbo lakip usab ngadto sa ubang dapit.

Nasuta sa NBI gikan sa Department of Migrant Workers (DMW) nga bogus ang grupo sa mga suspetsado diin dugay na nga dili konektado sa gipailang kompaniya ang usa kanila ug gigamit lang ang ngalan sa kompaniya aron makapamiktima.

Ang mga suspetsado kinsa natingkagol sa detention facility sa NBI ang nihimakak sa pasangil batok kanila.

Ug uban kanila nangangkon nga nabiktima usab sila tungod kay apil sila sa na-recruit ug aron ma-priority nag-volunteer sila sa mga kalihokan sa grupo. (BANAT NEWS)