Motorsiklo gitugotang makaagi sa Pulangbato Bridge

CEBU, Philippines — Gitugotan na ang mga motorsiklo nga motabok sa Pulangbato Bridge nga nahimutang sa Sitio Candarong, Barangay Pulangbato usa sa mga bukirang barangay sa Dakbayan sa Sugbo aron mahatagan og temporaryong agianan ang mga residente tungod sa sagunson nga pag-uwan.

Ang taytayan gibuksan niadtong Oktubre 10, 2026 diin gitambongan kini ni Mayor Nestor Archival ang maong kalihokan.

Matud ni Archival nga mga motor lang ang mamahimong makaagi sa pagkakaron ug gidili ang pag-agi sa mga sakyanang upat ang ligid tungod kay wala pa mahuman ang kaugmaran sa taytayan.

Gipasabot ni Archival nga limitado lang una ang pag-abli human nihangyo ang kapitan sa barangay tungod sa kabalaka sa nagkagrabeng kahimtang sa panahon.

Ang pag-abli niini alang sa mga motorsiklo makapagaan sa pagbiyahe tali sa Pulangbato ug sa mga kasikbit nga barangay sa bukid ilabi na kong mobunok ang uwan ug delikado ang pagtabok sa sapa.

Gipadayag ni Archival nga gitumong sa siyudad nga mahuman ang nahibiling mga trabaho sa taytayan sa dili pa matapos ang tuig 2026.

Ang maong taytayan gipundohan og P27 milyones apan nalangay tungod sa nagkadaiyang hagit sa construction ug teknikal nga mga isyu.

Ang maong taytayan nanukad sa Sitio Candarong paingon sa dalan sa Tanay ug naguba kini tungod sa bagyong Odette niadtong Disyembre 2021 ug nasamutan kini og guba sa bagyong Agaton niadtong Abril 2022. Gilaoman nga mahuman ang taytayan niadtong Disyembre 2025 isip pinaskohan sa mga residente apan napakyas ang contractor sa gikatakdang oras sa paghuman gumikan sa mga kakulian. (BANAT NEWS)