4 natabunan sa landslide

CEBU, Philippines — Duha ka mga balay nga dunay upat ka miyembro sa pamilya ang natabunan sa nidahili nga yuta sa ibabaw nga bahin sa Sitio Kandarong Riverside, Barangay Pulangbato, Dakbayan sa Sugbo, tungod sa kusog nga pag-uwan kagahapon Biyernes, Oktubre 9, 2026.

Hangtod alas 4:35 sa hapon, tulo sa upat ka biktima ang kumpirmadong namatay, lakip ang duha ka bata nga nag-edad og singko ug sais anyos, ug ang ilang 60 anyos nga babayeng apohan, samtang ang 38-anyos nga inahan sa mga bata nalandig sa tambalanan.

Sumala pa sa Cebu City Disaster Risk Reduction Office, ang mga nakalas mao silang Judith  Bonghanoy -60 anyos nga hangtud ning pagsulat sa balita nakit-an na sa ilawom apan wala na maglihok ug padayun pang giugkat ;  ug ang mag-agaw nga silang Xian Kyrie Caballero, 5 , Kayden Avery Andamon,5.

Samtang gidala sa tambalanan ang inahan ni Kayden nga si Julie Pearl Andamon,38.

Matud ni Konsehal David “Dave” Tumulak, Chairman sa Cebu City Disaster Risk Reduction and Management Office (CCDRRMO), naglisod ang mga rescuers tungod sa padayon nga pag-uwan ug pagsige og pangatagak sa mga bato ug yuta gikan sa natumpag nga ibabaw nga bahin sa bukid maong nagmatngon sa ilang mga lihok ang mga responders.

Tungod sa nahitabo, gimando ni Mayor Nestor Archival sa publiko ilabi na sa mga residente duol sa mga tiilan sa bukid ug pangpang nga mohiklin lang una sa mas luwas nga lugar.

Basi sa talaan sa Department of Social Welfare Service, niabot 29 ka mga panimalay ang napugos sa pagpabakwit ang mga nagpuyo nga 35 ka pamilya o 137 ka indibidwal.

Ang Cebu City DSWS nihatag na og pasiunang hinabang sa mga apektadong pamilya apil ang pagkaon ug hot meals sulod sa tulo ka adlaw.

Girekomendar sab nga pahatagan og financial assistance ang pamilya sa mga namatay nga tag P20,000 kada usa ug tabangan ang survivor sa pagpatambal kaniya. Ang mga tag-iya sa mga panimalay nga nagusbat pahatagan sab og tag P20,000.

Giawhag sab niya ang mga motorista nga dili magtambay sa dalan duol sa nahitaboan aron paspas nga makaabot ang mga responders ug ilang mga gamit sa operasyon.—  IBM BANAT NEWS