Hit and run, 1 patay

CEBU, Philippines — Patay ang usa ka 27-anyos nga babaye samtang naangol ang iyang ka-live-in partner nga 56-anyos nga Amerikano human silang duha gibanggaan og usa ka Toyota Fortuner nga mitabok ngadto sa pikas direksyon sa General Maxilom Avenue, Cebu City niadtong Septiyembre 21, 2026.

Ang mga biktima mao sila si Criza Jean Aque Concha, 27, residente sa Lahug, Cebu City, ug John Charles Livingstone, 56, usa ka Amerikano.

Ang giingong nakabangga kanila mao si Ralph Anthony Peggy Go, 25, residente sa Urgello Street, Cebu City, nga nagmaneho sa puti nga Toyota Fortuner nga adunay plate number GBC1684.

Sumala sa Traffic Enforcement Unit (TEU), nahitabo alas 2:51 sa kaadlawon ang insidente.

Base sa kuha sa CCTV camera gikan sa Cebu City Eagle Eye system ug sa boluntaryong pahayag ni Go, gikan siya sa Gorordo Avenue gikan sa direksyon sa Asilo de la Milagrosa sa wala pa ang insidente.

Pag-abot duol sa Iglesia ni Cristo Church, miliko siya paingon sa Mango Avenue.

Samtang nagpadayon sa pagbiyahe ug paglabay sa may Puregold, giingon ni Go nga kalit siyang nakasinati og duka nga maoy hinungdan sa pagkawala niya sa kontrol sa sakyanan.

Mitabok ang Fortuner ngadto sa pikas lane ug nabanggaan ang duha ka pedestrian nga didto sa maong lugar.

Tungod sa kusog sa pagkabangga, nalabay si Livingstone ngadto sa kilid sa dalan samtang napasok sa ilawom sa sakyanan si Concha. Apan niabante pa gyud ang sakyanan ug matud pang Livingstone naligsan gyud sa dughan ang iyang kapuyo ug nilahus og dagan ang sakyanan palayo.

Matud sa report, giingon ni Go nga wala niya dayon siya nakabantay nga nakabangga siya og mga pedestrian tungod sa kalit nga panghitabo.

Mipadayon siya sa pagmaneho hangtod sa Fuente Circle diin siya mihunong ug nagsusi sa iyang sakyanan kay nagtuo siya nga luwas ang maong dapit.

Apan pipila ka minuto ang milabay, giadto siya sa usa ka barangay tanod nga misulti kaniya nga ang iyang sakyanan nalambigit sa pagkabangga sa mga pedestrian.

Human niya nahibaw-an ang insidente, boluntaryo siyang mibalik sa lugar aron susihon ang kahimtang sa mga biktima ug atubangon ang nahitabo.

Gidala dayon sila Concha ug Livingstone sa Cebu City Medical Center alang sa medikal nga pag-atiman. Bisan pa sa pagtambal, gideklarar nga patay si Concha sa attending duty physician.

Si Livingstone nagpabilin sa ospital alang sa medical evaluation ug treatment, sumala sa TEU.

Samtang, gipaubos si Go sa Alcohol Breath Analyzer (ABA) test ug positibo kini, nga nakarekord og alcohol concentration nga 0.384.

Tungod niini, gi-isyu siya og Temporary Operator’s Permit (TOP) alang sa Driving Under the Influence of Alcohol. Sa pagkakaorn, nagpabilin si Go ubos sa kustodiya sa TEU.

Kasong Reckless Imprudence Resulting in Homicide and Physical Injury ang ipasaka batok sa maong drayber. (BANAT NEWS)