Nanigbas, armas nikagar nadakpan

CEBU, Philippines — Nasikop sa kapolisan ang usa ka lalaki nga giakusahan og suway pagtigbas ug pagpusil sa silingan niini diha sa Sitio Datag 1, Barangay Buagson sa lungsod sa Cordova niadtong Lunes sa buntag.

Sumala sa Cordova Municipal Police Station, alas 8:30 sa buntag sa Hulyo 6 dihang nakadawat kini og report gikan sa inahan sa biktima nga ang iyang anak gihataan og tigbas ug pusil sa ilang silingan.

Matud pa sa reklamante, gisuwayan og tigbas sa suspek ang biktima ug pagkahuman nipauli ug nikuha og armas ug gisuwayan og pusil ang biktima apan nikagar ang armas bisag makapila gikablit.

Swerte nga naabot dayun ang mga polis ug naabtan ang biktima nga adunay samad sa likod agi og tinigbasan.

Positibo usab nga giila sa biktima ang maong suspetsado, hinungdan nga midiretso ang mga operatiba ngadto sa iyang pinuy-anan.

Didto, nasakmit sa kapolisan ang usa ka sundang ug usa ka .45 kalibre nga pistola nga adunay upat ka  bala.

Napakyas ang suspetsado sa pagpakita og balidong lisensya o awtoridad sa pagpanag-iya sa maong armas, hinungdan nga gidakop siya sa kapolisan.

Giandam na usab sa kapolisan ang kasong attempted murder ug paglapas sa Republic Act No. 10591 batok sa suspetsado aron ipasaka sa korte. (BANAT NEWS)