Kapin 32,000 ka pamilya apektado sa linog
CEBU, Philippines — Moabot sa 2,505 ka mga balay ang nangaguba apil ani ang 460 nga nagusbat gyud ug kapin sa 2,000 partially damaged nga balay ang natala human sa nahitabong 7.8 magnitude nga linog niadtong hapon adlaw nga Martes.
Sumala pa sa tigpamaba sa Office of the Civil Defense nga si Junie Castillo, naapektohan sa maong linog ang 32,926 ka pamilya o 145,000 ka tawo gikan sa nagrabehang 163 ka barangays gikan sa Regions 9, 11, 12 ug sa Bangsamoro region.
Sa mga naapektahang pamilya, ang 8,725 ka pamilya o 31,700 ka tawo naa karon sa 54 ka evacuation centers. Laing 1,804 ka pamilya pud o 8,900 ka tawo ang naa sa gawas sa evacuation centers.
Ang pinakadako og danyos nga rehiyon mao ang Regions 11 ug 12 ilabi na sa General Santos City ug Sarangani.
Samtang dili lang mga pinuy-anan ang naapektohan, kay hasta ang mga health facilities apektado sab kay dunay mga pasyenteng gipaggawas sa mga tambalanan samtang giinspeksyon pa ang kaluwasan sa ilang mga buildings ug ang problema sab sa supply sa kuryente ug mga aftershocks.
Dunay mga generator sets ug fuel supply nga gihimong prayoridad para ibutang sa mga tambalanan samtang ang Department of Health maoy nanguna sa medical response sa mga apektadong lugar.
Ang OCD, DSWD, DOH ug uban pang mga ahensiya sa gobiyerno naghiusa sa pag-activate sa ilang mga response clusters para mahatagan og mapasilongan , pagkaon, medical ug emergency supplies ang mga biktima.
Sa pagkakaron, ang DSWD nakahatag na og 2,045 family food packs, 2,705 ready-to-eat food packs ug kapin 300 non-food items nga mokabat na tanan og P4 milyones matud pa sa OCD. Sa pagkakaron, wala pay nakitang kakulangon sa mga supply ug personnel tungod kay nitabang ang mga local government units ug regional offices sa response operations kaabag lang ang national agencies.— Gikan sa Philstar.com/IBM BANAT NEWS
- Latest
