“Among gi-ambush”

CEBU, Philippines — Igsuon sa prime suspect sa pagpusil patay kang Police Captain Joel Deiparine ug pagkaangol sa kauban niini, miangkon nga ilahang gi-ambush ang duha didto sa Sitio Balaw sa Barangay Sudlon 2 sa bukirang bahin sa Cebu City niadtong Oktobre 25,2025 sa hapon.

Pinaagi sa pagtugot sa iyahang legal counsel niatubang sa mga tigbalita si Dionesio Malabato Labajo alyas Jhuny, 64 anyos, ang half-brother ni Leonardo “Jun” Manto Jr., nga maoy prime suspect sa maong krimen.

Si Dionesio ug Jun manag-igsuon sa inahan. Base sa gisaysay ni Labajo, niadtong Sabado sa hapon, Oktubre 25, 2025 gitawgan siya sa iyahang manghod nga si Jun Manto Jr. nga nagpahibawong gisunod-sunoran siya og mga tawo nga nag-motorsiklo.

Matud pa niya, ang 17-anyos nga anak nga lalake ni Jun Manto Jr., mao ang nikuha sa mga armas sa ilahang balay ug didto nila kini gikuha sa tindahan kilid sa karsada.

Kini mao ang lima ka kalibre .45 nga armas ug duha ka tag-as nga kalibre sa armas sama sa Armalite ug 30 caliber Garand rifle nga matud pang Labajo mao ang iyang gigamit pag-ambush sa duha.

Nitawag pagbalik si Manto Jr., ug mimando nila nga mangandam kay nagpadulong na ang nag-motorsiklong mga tawo nga gasunod-sunod niya.

Pag-abot sa Mitsubishi Estrada ni Manto, gibabag dayon niini ang sakyanan sa karsada. Matud pang Labajo nipwesto na siyang daan sa walang bahin sa sin nga koral nga nag-imbaw sa karsada.

Samtang ang lain niyang mga kauban nga sila si alyas Allan ug alyas Renante naa sab nipwesto sa tuo nga bahin.  Pag-abot sa duha ka police nga nag-motorsiklo gipabuthan dayon nila kini.

Naigo sa tiil si Deiparine mao nga natagak sa mabaw nga kanal ang motorsiklo ug nangatumba sila didto.

Mibangon dayon si PEMS Artchel Tero nga kuyog ni Deiparine atong higayona ug misakay pagbalik sa motorsiklo apan wala kini undangi sa pagpusil nilang Jun ug Johnrey Manto hinungdan nga nidagan kini sa ubos ug nitago sa kakahuyan.

Matud pang Labajo nga nigawas matod pa si Jun Manto Jr. sa sakyanan ug giingong gitiwasan si Deiparine. Mismo si Labajo miingon nga sila maoy unang namusil sa duha.

Nakurat gyud sila nga mga polis diay ang ilahang gibirahan hinungdan sa ilang karatol apil na si Jun.  Gatuo gyud silang mga kabanay sila niadtong kanhi barangay kapitan nga giingong napatay sa dakbayan sa Toledo nga diin si Manto ang usa sa gitudlong suspek.  Matud niya gibaharan man kini nga panimaslan.

Nag-iyahay sila og sibat ang iyahang mga kauban apan siya diha ra siya iyang payag ug gipaabot nalang niya ang mga polis nga modakop niya.

Matud pa sab ni Labajo nga ang ig-agaw ni Manto nga si Johnrey nga nitago sa Samboan ug ni-surrender kang Councilor Dave Tumulak, apil gyud sa maong krimen.

               Ang pamahayag ni Labajo naghatag og katin-awan sa unang gipamahayag ni Manto sa interbyu kaniya ni Atty. Ruphil Bañoc sa RMN-DYHP Cebu nga nangangkong wala siya nasayud kung kinsa ang mga nitabang kaniya pag-ambush sa mga polis.

Hinuon, tukma kini sa iyang giingong nga wala siya masayud nga mga polis ang nagsunodsunod niya.

Nangayo og pasaylo si Labajo sa pamilya ni Deiparine kay wala gyud siya masayod nga polis ang ilahang gipusil kay nagtuo sila nga ang gasunod-sunod sa iyahang manghod ang kontra niini sa pikas.

Sa laing bahin, miduaw sa haya ni Deiparine si Talisay City Mayor Gerald Anthony “Samsam” Gullas diha sa punerarya sa Barangay Mohon.

Si Deiparine nadestino isip assistant chief sa Intelligence Section sa Criminal Investigation and Detection Group (CIDG) sa Regional Field Unit-7.

Si Gullas nipaabot sa iyang pahasubo ngadto sa asawa ug sa tibuok banay ug midayeg sa serbisyong gihatag ni Deiparine para sa nasud .