Mindset bahin sa vlogging

CEBU, Philippines — Nahimong undanon ug puno sa impormasyon para sa mga tinun-ang nagtungha sa kursong komunikasyon ug journalism ang mga gipaambit sa duha ka mga inilang personalidad sa Sugbu ilabi na diha sa social media ug sa mainstream media atol sa  usa sa mga kalihokan alang 33rd Press Freedom Week.  Kini nga forum gipangulohan ug giorganisar sa The Freeman ug Banat News giulohan og “The Public Mindset: Vlogging as Civic Engagement” nga gihimo kagahapon, Septembre 23,2025 diha sa Diamond Suites and Residences sa Cebu City.

Mitambong sa kalihukan ang mga estudyante sa komunikasyon ug uban pang partisipante gikan sa nagkadaiyang mga unibersidad ug mga tunghaan aron maminaw sa mga panahom sa mga bantogang speakers nga sila si Atty. Regal Oliva ug beteranong mamamahayag nga si Leo Lastimosa.

Ang moderator sa maong forum mao si TF Managing Editor Fred Languido.

Gituki sa forum ang legal nga panglantaw bahin sa vlogging, ang etika sa journalism, ug ang papel sa digital platforms sa pagpakaylap sa balita ug impormasyon ngadto sa katawhan.

Gipahinumdoman sa beteranong magsisibya nga si Lastimosa ang mga kabatan-onang gustong mahimong tigbalita nga magpabilin sila nga matinud-anon sa propesyon. “In your most trying times, remember that you are a journalist,” matud pa niya.

Matud niya dunay mga tentasyon ug pagpanghulga apan kinahanglang magpabilin nga matinud-anon pinaagi sa konsensya.  “At the end of the day, you can ask yourself in the morning, did I acquit myself today? Did I not cheat on my conscience today? You can sleep happy,” dugang pa ni Lastimosa.

Samtang si Oliva mipasabot sa mga nitambong nga angay pilion ang gusto nilang himuong content kung gusto nilang mosulod sa vlogging. Apan gusto sab niyang ipahibalo sa tanan ang dakong kalainan sa vlogger ug sa usa ka journalist. Matud niya ang usa ka vlogger mahimong mobasi lang sa ilang opinyon bisan walay kompletong impormasyong ikapakita.

Apan mas lisud ang papel sa mga journalist tungod kay dili opinyon kondili facts o detalye sa estorya dala ang mga habig sa gihisgotan sa estorya ang ilang ipatik. “We can be wrong in our opinion, but we can’t be wrong in our facts,” matud ni Atty. Oliva kinsa dunay social media vlogs bahin sa mga legal nga mga isyu. Giangkon niya nga kinahanglang ma-regulate ang social media apan dili dapat moabot sa puntong matumban na ang katungod sa pagpadayag. Sa parte sa hulga aning mga trolls ug disimpormasyon, kun si Lastimosa mas piliong dili na tubagon ang insulto, si Oliva gustong pasabton ang tanan bahin sa isyu. Sa ilang panapos nga mensahe, gidasig sa duha ka speakers ang kabatan-onan nga magpabilin nga lig-on, dili mahadlok, ug ipadayag ang ilang hunahuna.  Gipahinumdoman usab sila sa pagdakop sa mga oportunidad, ug nga ang ilang passion ug interes maoy magtultol sa ilang dalan sa kinabuhi. Pagkahuman sa forum, nihatag og panahon ang duha ngadto sa mga tinun-an nga magpa selfie kauban nila. IBM BANAT NEWS