Protesta vs kurapsyon

CEBU, Philippines — Nilusad og lihok protesta kontra kurapsyon ang nagkadaiyang caused oriented groups sa Sugbu aron ipadayag ilang kasagmuyo batok sa mga indibidwal nga nakontrobersiya karon tungod sa flood control projects nga gipasangil nga gipangbulsa ang pundo.

Ang Panaghiusa sa Yanong Sugbuanon Batok sa Korapsyon o PAYONG nipahigayon sa ilang rally kagahapong adlawa nga nanawagan og mas lawom nga imbestigasyon sa ilang gihulagway nga sistematikong kurapsyon sa mga flood control projects sa nasud.

Ang organizer nga si Dennis Derige sa Sentro ng mga Nagkakaisa at Progresibong Manggagawa (SENTRO ) ug Edward Ligas, usa sa mga nagdumala sa panagtigom, misaway sa Ombudsman sa matud pa wala nila paghimo og aksyon, DPWH officials, ug mga kontraktor nga nag-abusar sa pundo ug ang ilang nahumang mga trabaho substandard nga proyekto.

Nangayo usab sila og transparency sa budget deliberations ug pagtukod og independente nga komisyon alang sa patas nga imbestigasyon.

“Look at the district engineers, they own luxury cars, stores, and condominiums, while the projects themselves are of very poor quality,” matud pang Ligas.

Matud niya, kun seryoso pa ang gobiyerno, dili lang DPWH officials ang gukdon kondili apil sab ang mga sindikato sa mga kontraktor.

Ang mga nag-rally nagbitbit og mga placards nga naay mga nawong nilang Senator Jinggoy Estrada, House Speaker Martin Romualdez,  mga Discaya,  ug Congresswoman Lolypop Ouano-Dizon.

Niduyog sab ang Cebu Citizen Anti-Corruption Watch nga nihimo og noise barrage sa kadalanan sa Cebu City nga nag-awhag sa mga Sugbuanon nga maghiusa batok kurapsyon.

Apan ilang gipanawagan ang pagpakanaog sa pwesto nilang Presidente Ferdinand “Bongbong” Marcos Jr. ug House Speaker Martin Romualdez.

Sumala pa sa mga organizers nga silang Jun Abines ug Jimboy Tiongko moabot 200 ka motorcycle riders ug 100 ka sakyanan ang niduyog sa caravan nga nihunong atubangan sa DPWH, Ma. Luisa Subdivision  ug Fuente Osmeña rotunda ug nilahus sa Plaza Independencia.

Ang PAYONG, usa ka coalition sa grassroots groups ug sektor, nag-rally ubos sa usa ka panawagan: Stop Corruption Now! Gilangkoban kini sa mga youth groups, religious sectors, business leaders, professionals, workers, farmers, and fisherfolks.

Matud pa sa grupo, mas dakong protesta ang mahitabo karong Septiyembre 21 nga madungan sa pagtimaan sa deklarasyon sa Martial Law.

Unang nabisto kaning anomalya sa flood control projects ug natribukar pa gyud og maayo human nga si Presidente Ferdinand Marcos Jr. sa iyang uwahing state of the nation address mipalabtik sa mga gitahasan sa pagtrabaho aning mga proyektoha nga wala magkadimao ug duna pa gyuy mga ghost projects nga ang naa sa dokumento nakompleto na.

Gani atol sa SONA si Marcos miingon “Mahiya naman kayo.” Nahitabo kini tungatunga sa tiyabaw ug reklamo sa publiko sa grabeng pagsaka sa baha sa halos tanang dapit sa Pilipinas matag adunay kusog nga pagbunok sa uwan.

Human niini, sunod-sunod nga naghimo og personal nga inspeksyon si Marcos sa mga proyekto ubos sa Department of Public Works and Highways ug daghan siyang nasakpang mga proyekto sama didto sa Bulacan nga dunay mga ghost projects, dunay substandard ang pagkahimo, ug dunay mga kontraktor nga gipaboran.

Duna say gihimong imbestigasyon diha sa Senado ug sa Ubos Balay Balauranan nga diin dunay mga nasakpang opisyales sa DPWH, mga kontraktor ug mga magbabalaod nga nagkunsabohay matud pa sa pagbulsa sa budget sa flood control projects.

Atol sa dagan sa imbestigasyon nagkadaghan ang mga nangasakpang nagbinuang sa trabaho, dunay mga kontraktor nga namasangil nga pugsanay ang pagpangayo kanila sa pipila ka opisyales sa DPWH tungod sab matud pa sa mando pipila ka mga magbabalaod , apil sa gipasanginlan ang ig-agaw ni Marcos nga si House Speaker Martin Romualdez kinsa kusganong mihimakak niini.

Ang maong kontrobersiya niresulta sab sa kalit nga pag-ilis sa liderato sa Senado nunot sa matud pa pagkawagtang na sa pagsalig sa publiko sa maong hawanan nunot sa ilang dinad-an sa mga imbestigasyon.

Karong bag-o, nagumol si Marcos og independenteng komisyon nga mosubay sa tanang mga flood control ug government infrastructure projects sulod sa nakalabay nga napulo ka tuig  ilabi na kadtong mga kadudahan ug anomaloso ang pagkahimo ug pag-award sa mga kontrata aron pangkasohan ang tanang nalambigit niini.

Dugang pa niini, gimando ni Marcos nga wala nay gahing budget para sa flood control ang DPWH para sa tuig 2026, kini aron wala nay makalusot nga mga anomalosong budget nga ipang-insert nga nahimong problema ug gituohang diha nagagikan ang kurapsyon.

“We have already accomplished a lot as of now [in the review]. Number one, we are already seeing that all the flood control projects that were supposed to be included in the 2026 budget may no longer be necessary,”matud pa niya sa iyang BBM Podcast nga gipagawas niadtong adlaw nga Lunes.

“So, there will be no budget for flood control in 2026, because there is still P350 billion for 2025 that has not really been spent. So, the work will continue,” matud pa niya.  — Philstar.com/IBM (BANAT NEWS)