Budget alang sa feeding sa mga tinun-an giumentohan

CEBU, Philippines — Giusbawan sa Department of Social Welfare and Development (DSWD) ang 2025 budget sa Supplemental Feeding Program (SFP) aron makab-ot ang nutrisyunal nga panginahanglan sa mga bata nga na-enrol sa public child development centers (CDCs) ug supervised neighborhood plays (SNPs).

Alang sa School Year 2025-2026, mokabat sa P5.182 bilyon ang budget sa SFP human giusbawan sa DSWD. Matod ni DSWD Secretary Rex Gatchalian gibanabana nga 1.5 milyon ka mga estudyante sa mga CDC ug SNP ang makabenepisyo niini.

Nunot sa usbaw, ang unit cost matag hot meal mahimong P25 sugod karong school year, gikan sa P15 sa miaging mga tuig, matod ni Gatchalian. Ang DSWD chief nagkanayon nga ang umento gitumong aron masiguro nga makabaton og igo ingon man masustansya nga pagkaon ang matag tinun-an sulod sa 120 ka adlaw ubos sa programa. Gawas sa mga hot meal, ang mga bata nga kuwang sa sustansya makadawat usab og presko nga gatas nga nagkantidad og P22 kada usa aron suportahan ang mas maayong physical development ug matubag ang sayo nga mga timailhan sa malnutrisyon. Dugang ni Gatchalian, ang mga pagkaon nga gi-serve estriktong nagsunod sa fixed menu base sa Pinggang Pinoy, ang dietary guide nga girekomendar sa National Nutrition Council (NNC) ug gi-validate sa Food and Nutrition Research Institute sa Department of Science and Technology (DOST-FNRI). (BANAT NEWS)