Basurang campaign materials i-reuse, i-recycle

CEBU, Philippines —  Si Cebu City Mayor-elect Nestor Archival, kinsa naila nga usa ka environmentalist niawhag sa tanan sa pag reuse ug recycling sa mga campaign materials nga gipangbaklas karon nga natapos na ang midterm election 2025.

Ang panawagan ni Archival nahasubay sa apelar ni  Environment Secretary Maria Antonia Yulo Loyzaga sa publiko nga motabang sa responsableng paghipos sa basura sama aning mga campaign materials.

Si Archival pinaagi sa iyang social media platforms mipakita sa iyang grupo nga nagpahigaon og ilang Operation Baklas kauban ang Nestor Archival Rescue and Fire Brigade (NARF).

Giawhag ni Archival ang mga pribadong tawo nga nitugot pabutangan og campaign posters ang ilang lugar nga kung mahimo  gamiton sa lain o ba kaha i-recycle kini.

Mipasidaan si Archival nga kun dili kini tarungon og hipos, posibleng mabara niini sa agianan sa mga tubig ug maoy hinungdan unya sa baha, ilabi na nga daghan sa mga campaign posters ginama sa tarpaulin nga di dayun malata.

“Another day, another opportunity to make Cebu greener and more livable for all,” matud pa sa iyang post.

Gipahibalo ni Archival nga ang uban sa iyang campaign tarpaulins gidonar na nila karon sa Bayanihan Women’s Group sa Barangay Luz aron i-recycle, giawhag sab niya ang ubang mga tawo o organisasyon kun interesado aning maong mga tarpaulins para sa ilang mga proyekto.

“If anyone else would like to repurpose some of these tarps for useful projects, just send me or the NARF Brigade a message with your name or organization, contact number, and location so we can reach out to you,” matud niya.

Sa sayo pa si Environment Secretary Loyzaga nimando sa  mga pangulo sa Environment Management Bureau (EMB)  nga pangunahan ang koleksyon, repurposing, reuse, ug recycling sa campaign materials tibuok nasud.

Giawhag sab niya ang publiko nga motabang ani nga tinguha.

Sa pagkakaron ang EMB dunay kolaborasyon sa Green Convergence, usa ka multi-sectoral coalition  nga nagduso og sustainability,  apil na ang ubang non-government organizations aron mamenusan ang epekto sa mga plastic nga basura, posters, ug tarpaulins.

“Organizations like Green Convergence… will serve as valuable allies in this initiative, providing guidance and resources for effective recycling efforts,”  matud pang Loyzaga.

“Being responsible stewards of the environment demonstrates our love for our nation and our commitment to a brighter future for all Filipinos,” dugang pa niya.

Sa pikas bahin, nanangtang nasab sa mga campaign posters sa kagamhanan sa lungsod sa Minglanilla.

Si Mayor Rajiv Enad sa iyang Facebook post nimando sa iyang mga sakop sa paglimpyo na sa ilang palibot sa campaign paraphernalia.

Samtang sa Dakbayan sa Talisay, nitugot rasab si Mayor Gerald Anthony “Samsam” Gullas nga pangkuhaon ang ilang tarpaulin sa mga tawo nga gusto nga mogamit niini.

Si Gullas nipahibawo nga mahimo ra gyud kini nga ma recycle ug mapuslan ang ilang campaign posters.

Gawas niana, ang Aksyon Agad Team ang iyang gimandoan sa pagtangtang niini. Gisuroy sab ni Gullas ang nagkalain-laing opisina sa City Hall aron personal nga mopasalamat sa ilang padayon nga pagsuporta.

Iyang gipahibawo nga padayon sila nga mohatag og mga maayong serbisyo sa Talisaynon. (BANAT NEWS)