Binandol nga kwarta nasakmit
CEBU, Philippines — Siyam ka mga langyaw nga gituohang mga Chinese ug Malaysian nationals ug duha ka mga Pilipinong kauban ang gikustodiya sa kapulisan sa Aviation Security Unit ug sa Police Regional Office 7 human sa suway nga pagpalusot sa minilyon nga kantidad sa kwarta diha sa Mactan Cebu International Airport.
Ang tigpamaba sa Lapu-Lapu City Police Office, Lieutenant Colonel Christian Torres sa interbyu kaniya sa miingon nga base sa imbentaryo moabot og P441 million ang inisyal nga kantidad nga naihap, ug gipaabot nga mas dako pa kini kun mahuman.
“Pero karon lang mura og nadungagan og mga P400,000 naa ni sa mga bag nila. Kay kaninga P441 million mao man ni ang naa sa ilang trolley,” dugang pa ni Torres kagabii.
Ang mga dinakpan gipaubos na dayun sa inquest proceedings kagabii ug temporary na karong gi- detain LLCPO detention cell.
Matud ni Torres nasakpan kini atol sa screening airport General Aviation area sa Lapu-Lapu City niadtong Biyernes sa gabii samtang ang grupo padung na mosaka og pribadong eroplano padung sa Manila.
Sa inisyal nilang imbestigasyon, ang maong kwarta gikatahong gikan sa daog sa casino sa Cebu City sa nanglabay nga mga adlaw.
“Mura layo ra ang posibilidad nga gamiton ni sa vote buying kay kasagaran ani nila mga foreigners man,” ni Torres pa.
“Padung sila sa Manila from Cebu and I heard they are bound for China,” dugang pa sa maong opisyal.
Ilaha sab karong gisusi kun nalambigit ba ang grupo sa ilegal na karon nga Philippine Offshore Gaming Operations (Pogo).
Ang mga dinakpan gidudahang nakalapas sa Commission on Elections Resolution 11104, nga nagdili sa pagdala og dakong kantidad ning panahon sa eleksyon. The Freeman ug Rowena Capistrano, IBM BANAT NEWS
- Latest
