Testing sa ACMs bantay-sarado

CEBU, Philippines — Ipahigayon karong buntag adlaw nga Miyerkules May 7, 2025 ang simultaneous final testing ang sealing sa mga automated counting machines (ACM) diha sa mga tulonghaan sa Sugbo nga gamiton voting presincts alang sa nagsingabot nga National and Local Elections 2025.

Ang mga ACMs gipanghatud sayo sa kadlawon adlaw nga Miyerkules diin giuna ang mga naa sa bukiran nga barangay nga giubanan sa kapulisan.

Alas nuybe sa buntag ipahigayon ang simultaneous FTS nga tambongan sa mga magtutudlo, Comelec ug mga dinapit mga representante sa matag partido.

Sa Dakbayan sa Talisay gisugdan kagahapon sa buntag ang paghatud sa mga ACM sa mga tunghaan para sa FTS nga ipahigayon karon buntag.

Sa Barangay Tangke gipahimutang kini sa Tangke Elementary School ug para maseguro ang seguridad sa mga ACM gipahiluna kini sa principal’s office.

Ang Comelec nipahibalo nga abli sa mga nagkadaiyang political parties ug uban pang sector nga buot mosaksi sa pagpahigayon sa FTS karon adlawa Miyerkules.

Sa pikas bahin, si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office(CCPO) nga 100 porsiyento nga andam ang kapulisan sa paghatag og seguridad sa final testing and sealing sa mga Automated Counting Machines(ACMs) karong adlawa, May 7, 2025.

Base  matod pa sa ilang coordination sa Commission on Election(COMELEC) karong kadlawon ipanghatod ang ACMs uban ang mga batteries, balot boxes ug ubang election paraphernalia gikan sa Cebu City Hall paingon sa mga nagkadaiyang polling centers.

Kun ma-release kini sa Treasurer's Office kuyogan kini sa mga police hangtud nga ang maong mga items maabot sa mga polling centers ug dili na kini biyaan hangtud sa umaabot nga adlaw sa piniliay.

"Ang atoang kapulisan gi-deploy na sila sugod Mayo 5 and kana sa pag secure sa atoang Treasurer’s Office ang location kung asa karon gi-store ang ACMs which is ang gi-designate nga canvassing area which is at the fourth floor of Cebu City Hall and sugod karong gabie hatagan na pud nato og deployment ang mga respective polling centers sa pagbantay ani nga election paraphernalia ug kaning mga ACMs nato nga dili gyud sila ma tamper, dili mabinuangan up until mahuman ang final testing and sealing and hantod nga moabot na pud ang mga balota come May 12," sigon ni Macatangay.

Dili moubos sa usa ka libo ka mga police ang gipakatap sa CCPO sa tibuok areas of concerns sa Cebu City.

Ang minimum deployment matag polling centers, upat ka polis apan dunay ubang polling centers nga mas daghan kay gitan-aw nila ang sitwasyon niini sama sa daghang botante, lokasyon, lisod ba adtuon para sa mga PWDs ug senior citizens nga mga botante.

Ang Cebu City dunay 73 ka polling centers sa kadaghanan niini naa sa mga bukirang dapit sa siyudad.

Giklaro sab ni Macatangay nga dili lang polling centers ang hatagan nila og pagtagad karong, ang ilang anti-criminality response magpabilin ra gihapon. Decemay P. Padilla, IBM BANAT NEWS