Garcia: pag-away mo og inyo

CEBU, Philippines — Natapos na ang duha ka adlaw nga One Cebu Northern Caravan pinaagi sa kataposan nilang girumbo ang lungsod sa Consolacion town. Ang One Cebu Northern Caravan nilanat og 16  oras nga pangampanya sa mga kandidato sa partido ni Gobernador Gwendolyn Garcia inubanan ni kanhi senador Manny Pacquiao ug Senator Pia Cayetano sa kataposang adlaw.

Sa iyang pagpamulong sa Consolacion, si One Cebu party  si Garcia mipasabot sa mga tawo nga, mas gihatagan sa Cebu og pagtagad ang lokal nga yangungo sa mga tawo.

“Pag-away lang mo diha og inyo. Ay mi'g apil-apila diri kay busy mi mga Sugbuanon nga magpalambo sa among lalawigan sa Sugbo. Kamoy pagpili sa inyong impiyerno kay dinhi sa Sugbo langit ang among tinguha,” matud pa sa gobernador.   “Busa kinsa man na sila nga buot magsamok samok? Maayo ra ba og dunay nahimo sa nilabay nga unom ka tuig, mayra ba og naay natabang sa nga Sugbuanon. Kung kinsa man na sila pabalika sa ilang kweba kay lage dili nato tugtan nga uyugon kining atong kahiusahan. Hangyo ko kaninyo panalipdi kay nagkahiusa ta. Ayaw tugti ang mga kampon sa kangitngit nga maoy magbuak buak na usab ka nato. Kay kung ato ning panalipdan, magpadayon ang atong panaghiusa, kahayag sa umaabot nga mosunod na usab nga tulo ka tuig sa Consolacion ug tibuok lalawigan sa Sugbo,” matud pa sa gobernadora atubangan sa nagdasok nga mga tawo sa gymnasium sa lungsod sa Consolacion.

Human sa iyang pagpamulong, giisa sa gobernadora ang mga kamot sa Team Alagad pinangulohan ni Mayor ug mayoralty candidate Teresa “Nene” Alegado ug kanhi mayor nga karon vice mayoralty aspirant Joannes “Joyjoy” Alegado uban sa ilang kaubang kandidato sa pagka-konsehal.

Giisa sab sa gobernador ang mga kamot nilang kanhi Pacquiao ug Senador Pia Cayetano. Gikan sa pagsugod sa caravan didto sa habagatang Sugbu nikuyog na si Pacquiao pagkampanya sa 16 ka mga lungsod hangtud nga natapos ning tanan sa amihanang bahin sa probinsya.

Si Pacquiao kinsa nag-inusarang 8-weight division boxing champion sa kalibotan, mipadayag sa iyang kampanya nga dunay paglaum ang tanan ug andam siyang moserbisyo sa Sugbu ilabi na sa gubat kontra kakabus ug kurapsyon.

Samtang si Cayetano sa iyang bahin nipasalamat sa suporta kaniya ni Garcia ug sa mga Sugbuanon nga wala mobiya pagsuporta kaniya ug sa iyang pamilya nga sukad pa kaniadto nagserbisyo na sa publiko. Gilibot ni Cayetano ang mga lugar sa Sugbo ug nakigkita sa mga local leaders ug mga konstituwente sa Cebu City, Talisay, Consolacion, ug Lapu-Lapu.

Giabi-abi siya sa mga lokal nga opisyales ug mga lokal nga partido sama sa Alayon ni Talisay City Mayor Samsam Gullas, Team Kaabag of Lapu-Lapu Mayor Ahong Chan.

Si Cayetano mao ang nangamahan sa mga balaod nga karon napahimuslan sa mga Pilipino para sa maayong panglawas sama sa mandatory hepatitis B vaccination for newborns, ang Doktor Para sa Bayan Act, ang libreng dormitory para sa mga estudyante sa state universities sama sa UP Cebu— mga programang gibase sa iyang kasinatian isip usa ka inahan ug isip usa ka abogada.

Gawas nila, nikuyog sab sa caravan silang Sixth District Congresswoman Daphne Lagon ug Ako Bisaya Partylist Congressman Sonny Lagon. Kauban ang ilang second nominee nga si Carissa Garcia.

Apil sa gisuportahan sa One Cebu gawas nilang Pacquaio ug Cayetano nga nikuyog sa Northern Caravan mao silang senatorial candidates Vicente “Tito” Sotto III, Panfilo “Ping” Lacson, Camille Villar, Bong Revilla ug Francis Tolentino.

Ang One Cebu Party nisuporta sa walo ka kandidato sa Alyansa Para sa Bagong Pilipinas apil na si kanhi DILG secretary Benhur Abalos.

Ang Cebu mao ang dunay pinakadaghang botante nga probinsya sa tibuok Pilipinas pinaagi sa 3.4 million registered voters niini mao nga nagpabilin kining pinakadako og impact sa resulta sa national elections hinungdan nga halos tanang partido gustong makuha ang boto sa mga Sugbuanon.— /IBM (BANAT NEWS)