Nitulis sa ahente nadakpan
CEBU, Philippines — Nadakpan sa kapulisan sa Tagbilaran City Police Station Bohol Police Provincial Office (BPPO) ang kanhi driver sa usa ka iladong kompanya sa processed food nga mitulis sa ilang sales agent.
Ang suspetsado mao si alyas Dionisio, 40 anyos, ulitawo ug nagpuyo sa Purok 1, Barangay Kabasakan, Lungsod sa Getafe, Bohol.
Sa impormasyon sa Tagbilaran City Police Station nahitabo ang pagpanulis niadtong Miyerkules sa buntag, Abril 9, 2025.
Saysay pa sa sales agent ngadto sa kapulisan, padulong niya i-deliver ang mga produkto sa Dagohoy Public Market dihang giduol siya sa suspek ug gitionan og armas.
Gumikan sa kahadlok, natapik niya ang kamot sa suspetsado ug na-outbalance ang suspek ug ang biktima daling midagan ug nangayo og tabang.
Ang Theft and Robbery Section sa Tagbilaran City Police Station miadto dayun sa gipuy-an sa suspek kay nailhan man kini dayun.
Naabtan kini sa payag tupad ra sab sa balay niini ug gidakop kini sa otoridad human positibong gitudlo sa biktima nga nagtulis niya. Nasakmit sa kapulisan ang usa ka .38 revolver. (BANAT NEWS)
- Latest
